វៀតណាម៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា បណ្តាញ 5G របស់វៀតណាមទទួលបានអ្នកប្រើប្រាស់ចំនួន ៣ លាននាក់ក្នុងរយៈពេល ២ សប្តាហ៍ ដែលជាជំរុញដោយយុទ្ធសាស្រ្តធ្វើឲ្យប្រសើរឡើងដោយស្វ័យប្រវត្តិរបស់ក្រុមហ៊ុន Viettel អាចឲ្យអ្នកប្រើប្រាស់មានឧបករណ៍ត្រូវគ្នាផ្លាស់ប្តូរពី 4G ក្នុងតំបន់ទីក្រុង។
គិតត្រឹមថ្ងៃព្រហស្បតិ៍ ទូរគមនាគមន៍ Viettel គ្រប់គ្រងដោយយោធាបានរាយការណ៍ពីអ្នកប្រើប្រាស់ 5G ចំនួន ៣លាននាក់ ជាមួយនឹងការប្រមូលផ្តុំធំបំផុតនៅទីក្រុងហាណូយ ហូជីមិញ ប៊ិញឌឿង ដុងណៃ និងហាយផុង ដែលស្មើនឹងជិត ៥០ ភាគរយនៃការជាវ 5G សរុប។
VinaPhone និង MobiFone ក៏កំពុងផ្តល់ជូននូវការសាកល្បង 5G ទោះបីជាពួកគេមិនបានបង្ហាញចំនួនអតិថិជនក៏ដោយ។ ក្រុមហ៊ុន Viettel បានកត់សម្គាល់ថា កំណើនអ្នកជាវ 5G គឺលឿនជាង២ដង បើធៀបនឹង 4G របស់ខ្លួនកាលពីប្រាំពីរឆ្នាំមុន។ ឆ្នាំ២០១៧ បណ្តាញ 4G របស់ Viettel បានឈានដល់អ្នកប្រើប្រាស់ចំនួន ៣ លាននាក់ក្នុងមួយខែ ជាមួយនឹងស្ថានីយចំនួន ៣៦,០០០ ជាចំនួនច្រើនជាង 5.5 ដងនៃចំនួនស្ថានីយ៍ 5G បច្ចុប្បន្ន។
យោងតាមក្រុមហ៊ុនផ្តល់សេវាទូរស័ព្ទថា Viettel បានធ្វើពាណិជ្ជកម្ម 5G កាលពីថ្ងៃទី១៥ ខែតុលា ដោយអ្នកប្រើប្រាស់ដំបូងបានកត់ត្រានៅចុងខែកញ្ញា និងដើមខែតុលា។ ចំនួនអ្នកជាវបានកើនឡើងបន្ទាប់ពីកាលបរិច្ឆេទដាក់លក់ជាផ្លូវការ។
វិធីសាស្រ្តធ្វើឲ្យប្រសើរឡើងដោយស្វ័យប្រវត្តិ ឬ “មិនធ្វើអ្វីសោះ” បានជំរុញឲ្យមានការរីកចម្រើនយ៉ាងឆាប់រហ័ស ធ្វើឲ្យអ្នកប្រើប្រាស់ចូលប្រើ 5G ដោយមិនចាំបាច់ផ្លាស់ប្តូរស៊ីមរបស់ពួកគេ ឬចុះឈ្មោះសម្រាប់គម្រោងថ្មីមួយ។ តម្រូវការតែមួយគត់ គឺឧបករណ៍ដែលត្រូវគ្នា និងការចូលទៅកាន់តំបន់គ្របដណ្តប់៕
