ភ្នំពេញ ៖ លោកបណ្ឌិត មាស សារិន ប្រធានសហព័ន្ធកីឡាសីដក់ និង ឈិនឡូនកម្ពុជា នាថ្ងៃទី ២០ ខែវិច្ឆិកា ឆ្នាំ២០២៤ បានអញ្ជើញបិទវគ្គបណ្ដុះបណ្ដាល គណៈកម្មការរៀបចំការប្រកួតកីឡា សីដក់កម្រិត១ នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយធ្វើឡើង ដើម្បីសម្រួចសមត្ថភាពមន្ដ្រីបច្ចេកទេស របស់សហព័ន្ធ ដើម្បីត្រៀមរៀបចំការប្រកួត កីឡាសីដក់ ជ្រើស រើសជើងឯកថ្នាក់ជាតិ និងអន្តរជាតិនាននា ។
លោកបណ្ឌិត មាស សារិន ប្រធានសហព័ន្ធកីឡាសីដក់ និង ឈិនឡូនកម្ពុជា បានវាយតម្លៃខ្ពស់ ចំពោះការខិតខំប្រឹងប្រឹងរៀបចំវគ្គ បណ្តុះបណ្តុះបណ្តាល ក៏ដូចជាសិក្ខកាម ដែលជាមន្ត្រីអាជ្ញាកណ្តាល-ចៅក្រមដែលចូលរួមខិតខំក្រេបជញ្ជក់ចំណេះដឹង ដើម្បីយកទៅអភិវឌ្ឍវិស័យកីឡាសីដក់ និងឈិនឡូនកម្ពុជា ឲ្យកាន់តែរីកចម្រើនបន្ថែមទៀត។
លោកប្រធានសហព័ន្ធចាត់ទុកថា វគ្គបណ្តុះបណ្តាល ក្រោមការគាំទ្រថវិកា របស់ក្រសួងអប់រំ យុវជន និងកីឡា នាពេលនេះ ជាការអភិវឌ្ឍកម្រិតសមត្ថភាពឲ្យកាន់តែខ្ពស់បាន គឺត្រូវតែសិក្សាលើទ្រឹស្តីហើយត្រូវ ភ្ជាប់ជាមួយនឹងការអនុវត្តជាក់ស្តែងផងដែរ ។ មុនការប្រកួតនានា សហព័ន្ធតែងតែបើកវគ្គបណ្តុះបណ្តាលជាមុនសិន ដើម្បីពង្រឹងសមត្ថភាពមន្ត្រីបច្ចេកទេស ឲ្យកាន់ តែល្អប្រសើរបន្ថែម ។
កញ្ញា សួង ចាន់តូរ៉ាទី អគ្គលេខាធិការ ស្តីទីសហព័ន្ធកីឡាសីដក់ និងឈិនឡូនកម្ពុជា បញ្ជាក់ថា យោងតាមផែនការកសាងធនធានមនុស្ស របស់សហព័ន្ធកីឡាសីដក់ និងឈិនឡូន កម្ពុជា និងដោយមានការអនុញ្ញាត ជាគោលការណ៍ របស់លោកប្រធាន សហព័ន្ធកីឡាសីដក់ និងឈិនឡូនកម្ពុជា គណៈកម្មធិការប្រតិបត្តិ របស់សហព័ន្ធកីឡាសីដក់ និងឈិនឡូនកម្ពុជា សហការជាមួយក្រសួងអប់រំ យុវជន និងកីឡា ។
ការរៀបចំបើកវគ្គបណ្តុះបណ្តាលគណៈកម្មការ រៀបចំការប្រកួតកីឡាសីដក់កម្រិត១ ចាប់ពីថ្ងៃទី១៥-២០ ខែវិច្ឆិកា ឆ្នាំ២០២៤ ដោយមានសិក្ខាកាម ចំនួន៣២នាក់ ក្នុងនោះមានស្រី្ត ១៣ នាក់។ វគ្គបណ្តុះបណ្តាល ផ្តោតសំខាន់ការសិក្សាលើលក្ខន្តិកៈ របស់សហព័ន្ធកីឡាសីដក់ និងឈិនឡូនកម្ពុជា ដូចជាគោលបំណងនៃការរៀបចំការប្រកួត ការងារត្រូវធ្វើមុនការរៀបចំព្រឹត្តិការណ៍ ច្បាប់នៃការប្រកួត (បច្ចេកទេស) តួនាទី និងភារកិច្ចអ្នករៀបចំព្រឹត្តិការណ៍ ការរៀបចំពិធីបិទការប្រកួត និងរូបមន្តការប្រកួតកីឡា ៕
ដោយ៖លី ភីលីព
