មីយ៉ាន់ម៉ា ៖ លោក Htoo Ant Lwin ដែលជាអតីតនាយកជាតិ Miss Grand Myanmar ពេលនេះត្រូវបានគេរាយការណ៍ថា លោកមានសិទ្ធិជ្រើសរើសតំណាង ប្រទេសមីយ៉ាន់ម៉ា សម្រាប់ការប្រកួត Miss World 2025 ទោះបីជាលោកមានជម្លោះជាមួយកម្មវិធីប្រកួត Miss Grand International (MGI) ក៏ដោយ យោងតាមការចេញផ្សាយពីគេហទំព័រ VN Express ។
យោងតាមកាសែត Tien Phong កាលពីថ្ងៃទី ២១ ខែវិច្ឆិកា បាននិយាយថា លោក Htoo បានបង្ហោះនៅលើគណនី Facebook របស់ខ្លួនថា តើនរណានឹងក្លាយជាបវរកញ្ញាពិភពលោក ឆ្នាំ ២០២៥ ? វានឹងត្រូវបានប្រកាសក្នុងខែធ្នូ ។
លោក Htoo អាយុ ២៩ ឆ្នាំ ត្រូវបានគេរាយការណ៍ថា លោកកំពុងកាន់កាប់សិទ្ធិផ្តាច់មុខបវរកញ្ញាពិភពលោកសម្រាប់ប្រទេសមីយ៉ាន់ម៉ាដែលជាការផ្លាស់ប្តូរបានធ្វើឲ្យមនុស្សជាច្រើនភ្ញាក់ផ្អើល។ ការរំពឹងទុកក៏កើនឡើងអំពីថាតើ Miss Grand Myanmar 2024 នាង Thae Su Nyein អាយុ ១៧ ឆ្នាំនឹងតំណាងឲ្យប្រទេសមីយ៉ាន់ម៉ានៅMiss World 2025 ដោយសារទំនាក់ទំនងជិតស្និទ្ធរបស់នាងជាមួយលោកHtoo ។
កន្លងមក នាង Thae ធ្លាប់បានបង្ហាញពីចេតនាចង់ចូលរួមប្រកួតបវរកញ្ញា Miss Cosmo 2025 បន្ទាប់ពីត្រូវបានដកហូតដំណែងចំណាត់ថ្នាក់លេខ ២ ក្នុងកម្មវិធីប្រកួត Miss Grand International ឆ្នាំនេះ។
កាលពីថ្ងៃទី ២៦ ខែតុលា កម្មវិធី Miss Grand International រាត្រីចុងក្រោយនេះ នាង Thae ជាប់ចំណាត់ថ្នាក់លេខ ២ តាមពីក្រោយតំណាងមកពីប្រទេសហ្វីលីពីន និងឥណ្ឌា ដែលដណ្ដើមបានចំណាត់ថ្នាក់លេខ ១ និង ជ័យលាភីរៀងៗខ្លួន ។ ទោះជាយ៉ាងណាក៏ដោយ នាង Thae បានចាកចេញពីព្រឹត្តិការណ៍នេះ ដោយមើលទៅមិនសប្បាយចិត្ត ជាមួយក្រុមរបស់នាងភ្លាមៗ បន្ទាប់ពីការប្រកាសដោយជ្រើសរើស មិនចូលរួមក្នុងសកម្មភាព បានគ្រោងទុកសម្រាប់បេក្ខជនកំពូលទាំង ៥ ចុងក្រោយ។
នេះបើតាមសារព័ត៌មាន ABS-CBN ថា ការផ្សាយបន្តផ្ទាល់ Instagram នៅថ្ងៃបន្ទាប់នាង Thae បានប្រកាសថា នាងនឹងប្រគល់មកុដរបស់នាងវិញដោយបញ្ជាក់ថា នាងមានអារម្មណ៍ចាញ់បោកពីពានរង្វាន់ពិសេសចំនួន២ គឺ Best in National Costume និង Country’s Power of the Year ដូចដែលបានរាយការណ៍ដោយ ABS-CBN News ។ ពានរង្វាន់សម្លៀកបំពាក់ជាតិល្អបំផុតត្រូវបានផ្តល់ជូនដល់បេក្ខនារីមកពីប្រទេសប្រេស៊ីល អេក្វាឌ័រ និងហុងឌូរ៉ាស ខណៈប្រទេសថៃទទួលបានពានរង្វាន់ Country’s Power of the Year៕
