បរទេស៖ យោងតាមការចេញផ្សាយរបស់ RT បានឲ្យដឹងថារដ្ឋមន្ត្រីក្រសួងមហាផ្ទៃរបស់ប្រទេសទួរគីបាននិយាយកាលពីថ្ងៃអង្គារថា ហេតុការណ៍ភ្លើងឆាបឆេះនៅសណ្ឋាគាររមណីយដ្ឋានជិះស្គីមួយ នៅភាគពាយ័ព្យប្រទេសតួគីបានសម្លាប់មនុស្សយ៉ាងហោចណាស់ ៧៦នាក់ និងជាង ៥០នាក់បានរងរបួសផងដែរ។
ប្រភពដដែលបានសរសេរទៀតថាអគ្គីភ័យបានឆាបឆេះនៅព្រឹកព្រលឹមនៅឯសណ្ឋាគារ Grand Kartal ក្នុងរមណីយដ្ឋានជិះស្គី Kartalkaya ដែលជាទិសដៅកំសាន្តនៅរដូវរងាដ៏ពេញនិយមនៅក្នុងខេត្ត Bolu ។
យោងតាមរដ្ឋមន្ត្រីលោក Ali Yerlikaya អគ្គីភ័យបានចាប់ផ្តើមនៅជាន់ភោជនីយដ្ឋាននៃសណ្ឋាគារកម្ពស់១២ ជាន់ប្រហែលម៉ោង ៣និង ៣០ នាទីព្រឹក ហើយឆេះអស់រយៈពេល ៤៥នាទីទើបក្រុមការងារពន្លត់អគ្គិសភ័យអាចធ្វើដំណើរមកដល់ទិតាំងកើតហេតុប៉ុន្តែ អណ្តាតភ្លើងបានរាលដាលយ៉ាងឆាប់រហ័សដោយសារតែអគារភាគច្រើនគឺបានកសាងឡើងដោយសាច់ឈើសុទ្ធស្ទើរ ១០០ភាគរយ។
សាក្សីបានរាយការណ៍ថាឃើញផ្សែងខ្មៅហុយពេញសណ្ឋាគារ ១៦១បន្ទប់ក្នុងរយៈពេលប៉ុន្មាននាទី ដោយបង្ខំភ្ញៀវនិងបុគ្គលិករត់ភៀសខ្លួនទាំងភ័យខ្លាច។
លោក Yerlikaya បានប្រាប់អ្នកយកព័ត៌មានទៀតថា សណ្ឋាគារនេះកំពុងមានភ្ញៀវស្នាក់ចំនួន ២៣៨នាក់នៅពេលនោះ ដែលភាគច្រើនជាក្រុមគ្រួសារមកលេងកំឡុងពេលវិស្សមកាលសិក្សារយៈពេលពីរសប្តាហ៍ទូទាំងប្រទេស៕
ប្រែសម្រួល៖ ស៊ុនលី
