ខេត្តកណ្តាល៖ ក្រុមបាល់ទាត់ យុវជន សុ្រកមុខកំពូល និងប្រកួតក្រុមបាល់ទាត់ វិទ្យាល័យជ័យវរ្ម័នទី ៧ កើត ដណ្តើមបានកៅអីវគ្គផ្តាច់ព្រ័ត្រក្នុងការប្រកួតកីឡាបាល់ទាត់យុវជនក្រោម ១៨ ឆ្នាំជ្រើសរើសជើងឯកខេត្តកណ្តាលប្រចាំឆ្នាំ២០២៥ ដើម្បីចម្រាញ់រកកីឡាករ-កីឡាការិនីវ័យក្មេងឆ្នើមប្រចាំខេត្ត នាថ្ងៃទី២៧ ខែមករា ឆ្នាំ២០២៥ ក្រោយពីពួកគេបានយកឈ្នះលើគូប្រកួតរៀងៗខ្លួនវគ្គពាក់កណ្តាលផ្តាច់ព្រ័ត្រនៅកីឡដ្ឋានបាល់ទាត់ខេត្តនៅក្រុងតាខ្មៅ ការប្រកួតរៀបចំដោយការិយាល័យអប់រំកាយ និងកីឡា នៃមន្ទីរអប់រំ យុវជន និងកីឡាខេត្តកណ្តាល។
ចំពោះវគ្គពាក់កណ្តាលផ្តាច់ព្រ័ត្រ ក្រុមបាល់ទាត់ វិទ្យាល័យ សេរីភាព បានចាញ់ក្រោមថ្វីជើងក្រុមបាល់ទាត់ យុវជន សុ្រកមុខកំពូល ក្នុងលទ្ធផល ០ទល់នឹង ២ រីឯក្រុមបាល់ទាត់ បក្សីក្រហម ក៏បានចាញ់ក្រោមថ្វីជើងក្រុមបាល់ទាត់ វិទ្យាល័យជ័យវរ្ម័នទី ៧ កើតក្នុងលទ្ធផល ០ទល់នឹង ៤ ។ ដូច្នេះក្រុមបាល់ទាត់ យុវជន សុ្រកមុខកំពូល និងក្រុមបាល់ទាត់ វិទ្យាល័យជ័យវរ្ម័នទី ៧ កើត ត្រូវប្រកួតប្រជែងគ្នាដណ្តើមជើងឯក ចំណែកក្រុមបាល់ទាត់ វិទ្យាល័យ សេរីភាព និងក្រុម ក្រុមបាល់ទាត់ បក្សីក្រហម ដណ្តើមគ្នាយកចំណាត់ថ្នាក់លេខ ៣ ។
ការប្រកួតកីឡាបាល់ទាត់យុវជនក្រោម ១៨ ឆ្នាំជ្រើសរើសជើងឯកខេត្តកណ្តាលប្រចាំឆ្នាំ២០២៥ គឺជាការប្រកួតមួយដើម្បីជ្រើសរើសកីឡាករប្រភេទកីឡាបាល់ទាត់ នេះសម្រាប់ត្រៀមចូលរួមការប្រកួតកីឡាកម្រិតថ្នាក់ជាតិទូទំាងប្រទេស។ ការប្រកួតកីឡាបាល់ទាត់នេះជាឱកាសមួយសម្រាប់កីឡាករសាកល្បងសមត្ថភាព បច្ចេកទេស ទេពកោសល្យ និង ជំនាញវិជ្ជាជីវៈរបស់ខ្លួន។
ព្រឹត្តិការណ៍កីឡានេះក៏បានរួមចំណែកដល់ការបង្កើនមូលធនសង្គម និងការសម្រេចបាន សុខដុមនីយកម្មក្នុងសង្គមជាតិ ស្របពេលប្រទេសកម្ពុជាយើង ត្រៀមឆ្ពោះទៅកាន់ព្រឹត្តិការណ៍ការប្រកួតកីឡាយុវជនអាស៊ីឆ្នាំ២០២៩ ដែលកម្ពុជានឹងធ្វើជាម្ចាស់ផ្ទះរៀបចំការប្រកួត។ ការប្រកួតឆ្នាំមាន ១៤ ក្រុម គឺ ក្រុមបាល់ទាត់ យុវជនព្រែកត្នោត ក្រុមបាល់ទាត់ តាខ្មៅសុ្រកយើង ក្រុមបាល់ទាត់ បក្សក្រហម ក្រុមបាល់ទាត់ វិទ្យាល័យ សេរីភាព ក្រុមបាល់ទាត់យុវជន វត្តសិរីបន្ទាយដែក ក្រុមបាល់ទាត់ វិទ្យាល័យជ័យវរ្ម័នទី ៧ កើត ក្រុមបាល់ទាត់ វិទ្យាល័យជ័យវរ្ម័នទី៧ លិច ក្រុមបាល់ទាត់ ស្អាងយើងស្អាត និងក្រុមបាល់ទាត់ សាលារៀន វត្តបញ្ញាវ័ន្តខ្មែរ ក្រុមបាល់ទាត់។
ក្រុមបាល់ទាត់ សហភាពសហព័ន្ធយុវជនកម្ពុជា សង្កាត់តាក្តុល (ខេត្តកណ្តាល) ក្រុមបាល់ទាត់ វិទ្យាល័យ ពាមរាំង ក្រុមបាល់ទាត់ វិទ្យាល័យ ព្រែកស្លែង ក្រុមបាល់ទាត់ យុវជន សុ្រកមុខកំពូល និងក្រុមបាល់ទាត់ រដ្ឋបាលឃុំកំពុងស្វាយ៕
ដោយ៖ លី ភីលីព
