អាមេរិក ៖ យោងតាមការ ចេញផ្សាយពីគេហទំព័រ VN Express បានប្រាប់ឲ្យដឹងថា បុរសជនជាតិ កាណាដា Andean Medjedovic អាយុ ២២ ឆ្នាំ ត្រូវបានចោទប្រកាន់ពីបទលួចលុយ រូបិយប័ណ្ណគ្រីបតូមានទឹកប្រាក់ជាង ៦៥ លានដុល្លារ រួមទាំងទឹកប្រាក់ជាង ៤៨ លានដុល្លារពីវេទិកា blockchain ដែលមានមូលដ្ឋាន នៅវៀតណាម KyberSwap ។
ក្រសួងយុត្តិធម៌អាមេរិក បានប្រកាសពីការចោទប្រកាន់ កាលពីថ្ងៃច័ន្ទដោយបញ្ជាក់ថា លោក Medjedovic បានកេងប្រវ័ញ្ចភាពងាយរងគ្រោះនៅលើវេទិកា DeFi KyberSwap និង Indexed Finance ដើម្បីលួចរូបិយប័ណ្ណគ្រីបតូ ។
លោក Tran Huy Vu សហស្ថាបនិក និងជានាយកប្រតិបត្តិ នៃបណ្តាញ Kyber Network បាននិយាយថា ក្រុមហ៊ុនមិនទាន់បានយកមកវិញ នូវមូលនិធិត្រូវបានលួចនោះទេ ប៉ុន្តែបានផ្តល់សំណង យ៉ាងពេញលេញដល់ជនរងគ្រោះ ។ ការវាយប្រហារត្រូវបានពិពណ៌នាថា នេះជាការកេងប្រវ័ញ្ចកិច្ចសន្យាឆ្លាតវៃដែលស្មុគស្មាញបំផុត និងដោយប្រុងប្រយ័ត្នបំផុត បានកើតឡើងនៅថ្ងៃទី២៦ ខែវិច្ឆិកា ឆ្នាំ ២០២៣។
លោក Medjedovic បានគ្រប់គ្រងភាព ងាយរងគ្រោះក្នុងកិច្ចសន្យាឆ្លាតវៃរបស់ KyberSwap ដោយអនុវត្តប្រតិបត្តិការជាច្រើន ដើម្បីបង្កើនប្រាក់ចំណេញ របស់លោក ។
យោងតាមការចោទប្រកាន់បាននិយាយថា លោកបានរៀបចំផែនការ វាយប្រហារយ៉ាងល្អិតល្អន់ ដោយធ្វើការវិភាគលើគំរូសកម្មភាពរបស់នាយកប្រតិបត្តិ KyberSwap និងអ្នកប្រើប្រាស់នៅអាមេរិក និងអឺរ៉ុប មុនពេលចាប់ផ្តើមការ Hack ក្នុងអំឡុងពេលម៉ោងចរាចរណ៍ទាប ដើម្បីជៀសវាងការរកឃើញ។
លោកត្រូវបានគេចោទប្រកាន់ថា លោកបានបង្ហូរមូលនិធិពីក្រុមសាច់ប្រាក់ងាយស្រួល ៧៧ នៅលើ KyberSwap ដោយផ្លាស់ប្តូរទឹកប្រាក់ ៤៨.៤ លានដុល្លារតាមរយៈពិធីការ blockchain “bridge” និង cryptocurrency “mixers” ដើម្បីលាក់បាំងប្រភពដើមរបស់វា។
បន្ទាប់មកលោកត្រូវបានគេចោទប្រកាន់ថា បានប៉ុនប៉ង ជំរិត KyberSwap ដោយទាមទារការគ្រប់គ្រង ក្រុមហ៊ុនជាថ្នូរនឹងការប្រគល់មូល និធិដែលបានលួចមួយចំនួនមកវិញ។ បច្ចុប្បន្ននេះ លោកប្រឈមមុខនឹងការចោទប្រកាន់ ពីបទជំរិតទារប្រាក់ ការសមគំនិតក្នុងការលាងលុយកខ្វក់ និងការលួចបន្លំកុំព្យូទ័រដោយគ្មានការអនុញ្ញាត ដែលម្នាក់ៗអាចប្រឈមនឹងការផ្តន្ទាទោសដាក់ពន្ធនាគារពី ១០ ឆ្នាំទៅ ២០ ឆ្នាំ។
ភ្នាក់ងារពិសេសរបស់ IRS-CI New York ទទួលបន្ទុក Harry T. Chavis បាននិយាយថា នេះ គឺជាការក្លែងបន្លំដ៏ស្មុគ្រស្មាញ ដែលបានកេងប្រវ័ញ្ច ភាពងាយរងគ្រោះនៅកិច្ចសន្យាឆ្លាត វៃបណ្តាលឲ្យមានការលួចលុយរាប់លានដុល្លារ ជារូបិយប័ណ្ណគ្រីបតូ៕
