វៀតណាម ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា នៅពេលទូរស័ព្ទ iPhone ស៊េរីថ្មីជិតចេញលក់ ទូរស័ព្ទ iPhone ស៊េរីចាស់ដូចជា 13 បានបញ្ចុះតម្លៃរហូតដល់ ៥០០,០០០ ដុង (២០ ដុល្លារអាមេរិក) នៅតាមហាងលក់រាយធំៗក្នុងប្រទេសវៀតណាម ដែលជំរុញការលក់ ទោះបីជាមានការបញ្ឈប់លក់ក៏ដោយ។
កាសែត Dan Tri បានដកស្រង់ពីសង្វាក់លក់ រាយដោយនិយាយថា ចុងបញ្ចប់នៃត្រីមាសទី២ ជារយៈពេលយឺតនៅលើទីផ្សារទូរស័ព្ទ ជាពិសេសសម្រាប់ iPhones ដោយសារតែអ្នកប្រើប្រាស់ចូលចិត្ត រង់ចាំការចេញម៉ូដែលថ្មី ឬការបញ្ចុះតម្លៃលើម៉ូដែលចាស់ៗនៅពេលដែលម៉ូដែលថ្មីមកដល់។
ដូច្នេះ ដើម្បីរក្សានិរន្តរភាពនៃការលក់ អ្នកលក់រាយមានការផ្សព្វផ្សាយជាច្រើន។ iPhone 13 បច្ចុប្បន្ននេះមានតម្លៃ ១១.៥ លានដុង បញ្ចុះតម្លៃ ៥០០,០០០ ដុងធៀបនឹងខែមុន។ ម៉ូដែល 14 និង 14 Plus មានតម្លៃ ១២.៥ លានដុង និង ១៨ លានដុង សម្រាប់ទំហំ 128GB ហើយ 15 និង 15 Plus មានតម្លៃ ១៥.៥ លានដុង និង ១៩ លានដុង។
លោក Van Thi Ngoc Yen អ្នកគ្រប់គ្រងផលិតផល Apple នៅ Di Dong Viet បាននិយាយថា ពេលវេលានៃឆ្នាំនេះមិនមានផលិតផលថ្មីចេញទេ បន្ទាប់ពីការកែតម្រូវតម្លៃ ម៉ូដែលចាស់ៗជាច្រើនបានក្លាយជាជម្រើសដ៏ល្អសម្រាប់អតិថិជន។
អ្នកនាំពាក្យក្រុមហ៊ុន Minh Tuan Mobile បាននិយាយថា ការលក់ iPhone ស៊េរីចាស់ៗកើនឡើងបន្តិចបន្តួចបន្ទាប់ពីការកាត់បន្ថយតម្លៃ ហើយឥឡូវនេះ ១៣, ១៤, និង ១៥ មានចំនួនជាង ៤០ភាគរយនៃការលក់សរុប។
ក្រុមហ៊ុន Apple បានបញ្ឈប់ 13 ស៊េរីនាខែកញ្ញា ២០២៤ បន្ទាប់ពីការចេញផ្សាយនៃស៊េរី 16 ។ 14 និង 14 Plus ក៏ត្រូវបានដកចេញពីត្រកូលរបស់ខ្លួនដែរ បន្ទាប់ពីការប្រកាសចេញ iPhone 16e ក្នុងខែកុម្ភៈឆ្នាំនេះ ប៉ុន្តែតម្រូវការសម្រាប់ពួកគេបានបន្តកើនឡើងនៅប្រទេសវៀតណាម។
លោក Nguyen Lac Huy តំណាងផ្នែកទំនាក់ទំនងនៅក្រុមហ៊ុនលក់ទូរស័ព្ទចល័ត CellphoneS បាននិយាយថា ការលក់ iPhone 14 និង iPhone 15 ឥឡូវនេះបានកើនឡើង ២.៥ ដងបើធៀបនឹងខែកុម្ភៈ៕
