ទីក្រុងហាណូយ ៖ ប៉ូលិសទីក្រុងហាណូយ បង្ហើបឲ្យដឹងថា សាច់ជ្រូកដែលឆ្លងជំងឺប៉េស្តជ្រូកអាហ្រ្វិក ត្រូវបានគេសម្លាប់ដោយសម្ងាត់ និងលក់ទៅកាន់ទីផ្សារ និងភោជនីយដ្ឋាន នានាទូទាំង ទីក្រុងហាណូយ បន្ទាប់ពីប៉ូលិស ចាប់បានមនុស្ស ៤ នាក់ជាប់ពាក់ព័ន្ធលក់យ៉ាងសម្ងាត់តែម្តង យោងតាមការចេញផ្សាយពីគេហទំព័រ VN Express ។
បុរស ៤ នាក់រួមមាន លោក Le Van Tuoi លោក Dang Van Huy លោក Nguyen Viet Chiem និងលោក Du Dinh Hoi ត្រូវបានចាប់ខ្លួនពីបទបំពានច្បាប់ សុវត្ថិភាពចំណីអាហារ តាមដីកាចាប់ខ្លួនជាបន្ទាន់ ត្រូវបានចេញនៅដើមខែនេះ។
ប៉ូលីសបានបើកការស៊ើបអង្កេត បន្ទាប់ពីការ ផ្តល់ព័ត៌មានជាសាធារណៈ និងបានរកឃើញកន្លែងសត្តឃាតខុសច្បាប់ ដែលកំពុងប្រតិបត្តិការរវាងពាក់ កណ្តាលអធ្រាត្រដល់ម៉ោង ៣ ទៀបភ្លឺនៅក្នុងភូមិ Dan Nhiem, Du Xa និង Dang Giang ព្រមទាំងផ្សារ Phung Khoang ។
នៅថ្ងៃទី ៣០ ខែមិថុនា និងថ្ងៃទី ១ ខែកក្កដា ក្រុមការងារអន្តរកម្មមួយបានឆ្មក់ចូលទីសត្តឃាតដែលគ្រប់គ្រងដោយ Tuoi និង Nguyen Thi Thu នៅភូមិ Dan Nhiem។ មន្ត្រីបានរឹបអូសជ្រូកឈឺចំនួន ៤៥ ក្បាល សាច់ជ្រូកចិញ្ច្រាំចំនួន ១.០៥០ គីឡូក្រាម និងសរីរាង្គខាងក្នុងចំនួន ៤៥០ គីឡូក្រាម សរុបចំនួន ៤,៣ តោន ដែលអាចលក់បានជិត ៣២០ លានដុង (១២.៥០០ ដុល្លារ)។
ចាប់តាំងពីឆ្នាំ ២០២៣ ក្រុមនេះបានទិញជ្រូកឈឺ ឬងាប់ពីឈ្មួញកណ្តាលនៅ Ba Vi, Ung Hoa, My Duc និង Hoa Binh ដោយសម្លាប់វានៅផ្ទះ ដោយគ្មានអាជ្ញាប័ណ្ណ ។ ពួកគេបានកែច្នៃជ្រូកប្រហែល ៥០ ក្បាលជារៀងរាល់ថ្ងៃ ដោយលក់សាច់ជ្រូកក្នុងតម្លៃ ៥៥,000-៦០,000 ដុងក្នុងមួយគីឡូក្រាម ដល់អាជីវករ ផ្សារលក់ដុំដូចជា Phia Nam, Minh Khai និង Phung Khoang ហើយបន្ទាប់មកទៅកាន់ភោជនីយដ្ឋាន និងកន្លែងលក់អាហារ ដ៏មានតម្លៃនៅទូទាំងទីក្រុង ៕
