ភ្នំពេញ៖ អ្នកប្រដាល់កម្ពុជាវង្ស វិឆ័យ ក្លិបកងពលតូចទ័ពឆ័ត្រយោង ៩១១ ប៉ះអ្នកប្រដាល់ឆ្លងដែនថៃ Ao Vatan ក្នុងប្រភេទម្ងន់៦៧គីឡូក្រាមនាព្រឹកថ្ងៃអាទិត្យ ទី៩ ខែកុម្ភៈ ឆ្នាំ ២០២០ នេះ នៅសង្វៀន Boostrong Fighter On Fire របស់ SEATV ។
លោក ញាណ សុធី អ្នកចាត់ចែងកម្មវិធីប្រដាល់ប្រចាំSEATV បានឲ្យដឹងថា អ្នកប្រដាល់កម្ពុជាវង្ស វិឆ័យ ក្លិបចចកងពលតូចទ័ពឆ័ត្រយោង៩១១ មិនដែលជួបប្រកួតជាមួយអ្នកប្រដាល់ថៃ Ao Vatanឡើយ ចំពោះ Ao Vatan ជាអ្នកប្រដាល់ចាស់ធ្លាប់មកប្រកួតនៅស្រុកខ្មែរច្រើនលើក ព្រមទាំងមានស្នៀតប្រដាល់ល្អ តែការវាយចេញចូលរាងយឺត ។
ដូច្នេះ វង្ស វិឆ័យ មិនអាចមើលស្រាលគេបានទេ តែយ៉ាងណា Ao Vatan ក៏មិនជាស្រួលខ្លួនប៉ុន្មានដែរ ព្រោះវង្ស វិឆ័យ ក៏មានស្នៀតវាយខ្លាំង និងមានបច្ចេកទេសក្នុងការប្រកួតល្អដែរ ហើយមួយទៀត គេវាយរហ័ស ដករហ័ស ចេញចូលលឿនមិនចាញ់ Ao Vatan ទេ។
វិឆ័យមួយរយៈចុងក្រោយនេះ មានការរីកចម្រើននិងជឿនលឿនច្រើន ហើយក៏ទើបឈ្នះមេដាយមាសថ្មីៗនេះ។
ចំណែកវិឆ័យ របៀបវាយរបស់គេ កាន់តែល្អ និង រហ័សជាងមុន ហើយកម្លាំងកាយសម្បទានិង ទឹកចិត្តរបស់គេគឺខ្លាំងជានិច្ច។ វង្ស វិឆ័យប្រកួត៦៣លើក ឈ្នះ៥៧លើក និង ចាញ់០៦លើក មិនដែលស្មើ ខណៈ Ao Vatan ប្រកួត១៣១លើក ឈ្នះ៩០លើក ចាញ់៣៦លើក និងស្មើ៥លើក៕ ដោយ៖លី ភីលីព
