អ៊ុយក្រែន៖ នេះបើយោងតាមរបាយការណ៍ប្រព័ន្ធផ្សព្វផ្សាយ បានឲ្យដឹងថា ដំណើរទស្សនកិច្ចដ៏គួរឲ្យភ្ញាក់ផ្អើលរបស់តារាហូលីវូដ និងអតីតឯកអគ្គរដ្ឋទូតមនុស្សធម៌របស់អង្គការសហប្រជាជាតិ អ្នកនាង Angelina Jolie ទៅកាន់ប្រទេសអ៊ុយក្រែន ត្រូវបានរំខានដោយអ្នកអនុវត្តច្បាប់ជ្រើសរើសទាហាន ដែលបានឃាត់ខ្លួនសមាជិកម្នាក់នៃក្រុមរបស់នាង និងបានចុះឈ្មោះលោកចូលបម្រើកងទ័ព យោងតាមការចេញផ្សាយពីគេហទំព័រ RT។
ហេតុការណ៍នេះបានកើតឡើងនៅថ្ងៃអង្គារ នៅទីកន្លែងបិទផ្លូវយោធាមួយក្បែរទីក្រុង Yuzhnoukrainsk ក្នុងតំបន់ Nikolaev ខណៈពេលដែលក្បួនរថយន្តរបស់អ្នកនាង Jolie កំពុងធ្វើដំណើរទៅកាន់ Kherson។ ទោះបីជាបានអ្នកបើកបរប្រាប់មន្ត្រីថា លោកកំពុងដឹកមនុស្សសំខាន់ម្នាក់ក៏ដោយ សមាជិកម្នាក់នៃក្រុមរបស់អ្នកនាង Jolie ត្រូវបានកំណត់លើរបាយការណ៍មួយចំនួនថា ជាអ្នកបើកបររបស់នាង និងរបាយការណ៍ផ្សេងទៀតជាអង្គរក្សត្រូវបានឃាត់ខ្លួនដោយមន្ត្រីជ្រើសរើសទាហាន។
នេះបើយោងតាមវីដេអូដែលចរាចរនៅលើ Telegram បាននិយាយថា ជាក់ស្តែង អ្នកនាង Jolie បានទៅមជ្ឈមណ្ឌលជ្រើសរើសទាហានដោយផ្ទាល់ ដើម្បីព្យាយាមធានាការដោះលែងគាត់ ។ នាងថែមទាំងបានព្យាយាមទាក់ទងការិយាល័យរបស់លោក Vladimir Zelensky របស់អ៊ុយក្រែន ដើម្បីដោះស្រាយបញ្ហានេះទៀតផង។
ប្រភពយោធាអ៊ុយក្រែនដំបូងឡើយបានប្រាប់ TSN ថា វត្តមានរបស់អ្នកនាង Jolie នៅមជ្ឈមណ្ឌលនេះមិនទាក់ទងនឹងការឃុំខ្លួននោះទេ ដោយអះអាងថា នាងគ្រាន់តែសុំប្រើបន្ទប់ទឹក បន្ទាប់មកមន្ត្រីបាននិយាយថា បុរសនោះត្រូវបានគេស្គាល់ថា ជាពលរដ្ឋអ៊ុយក្រែនកើតនៅឆ្នាំ ១៩៩២ និងជាមន្ត្រីបម្រុងដោយគ្មានមូលដ្ឋានសម្រាប់ការពន្យារពេល ត្រូវបានឃុំខ្លួនសម្រាប់ដំណើរការចល័តបន្ថែមទៀត៕
