បេក្ខនារីបវរកញ្ញាចក្រវាឡឆ្នាំ២០២៥ ចំនួន៤ រូបបានដកខ្លួនចេញមុនការប្រកួតវគ្គផ្តាច់ព្រ័ត្រនៅប្រទេសថៃ

ថៃ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា បេក្ខនារីបវរកញ្ញាចក្រវាឡឆ្នាំ ២០២៥ តំណាងមកពីប្រទេសអាល្លឺម៉ង់ ប្រទេសពែរ្ស ប្រទេសនីហ្សេ និងប្រទេសអ៊ីស្លង់ បានប្រកាសដកខ្លួនចេញពីការប្រកួតបវរកញ្ញាចក្រវាឡឆ្នាំនេះ ដែលគ្រោងនឹងបញ្ចប់នៅថ្ងៃទី ២១ ខែវិច្ឆិកា នៅខេត្តណនថាបុរី ប្រទេសថៃ ជាផ្លូវការហើយ។

១.បវរកញ្ញាចក្រវាឡ នាង Helena O’Connor មកពីប្រទេសអ៊ីស្លង់៖អង្គការបវរកញ្ញាចក្រវាឡអ៊ីស្លង់ បានប្រកាសតាមរយៈប្រព័ន្ធផ្សព្វផ្សាយសង្គមនៅថ្ងៃទី ៨ ខែវិច្ឆិកាថា នាង O’Connor នឹងមិនចូលរួមប្រកួតនៅឆ្នាំនេះទេ ដោយលើកឡើងពីហេតុផលផ្ទាល់ខ្លួន។ អង្គការនេះបានបន្ថែមថា នាង O’Connor បានធ្លាក់ខ្លួនឈឺ ហើយកំពុងសម្រាកព្យាបាល។

២.នាង Diana Fast មកពីប្រទេសអាល្លឺម៉ង់៖នាង Fast បានចែករម្លែកការសម្រេចចិត្តរបស់នាងតាមរយៈប្រព័ន្ធផ្សព្វផ្សាយសង្គមនៅដើមខែវិច្ឆិកា ដោយនិយាយថា នាងចង់ផ្តោតលើគ្រួសាររបស់នាង និងលើការសាងសង់ផ្ទះថ្មីសម្រាប់កូនប្រុសរបស់នាង។ ចំណែកអង្គការបវរកញ្ញាចក្រវាលអាល្លឺម៉ង់បានសម្តែងការគាំទ្រចំពោះការសម្រេចចិត្តរបស់នាង ដោយរក្សាតំណែងរបស់នាង និងជ្រើសរើសមិនតែងតាំងអ្នកជំនួស។ ជាកាយវិការនៃសុច្ឆន្ទៈនាងឆ Fast និងអង្គការបានបរិច្ចាគប្រាក់ចំនួន ៣០,០០០ អឺរ៉ូ (៣៤,៧៣៦ ដុល្លារអាមេរិក) ដល់ HeartPawject ជាអង្គការមិនស្វែងរកប្រាក់ចំណេញរបស់ថៃ ដែលជួយសង្គ្រោះ និងផ្តល់ជម្រកដល់សត្វដែលរងរបួស និងគ្មានផ្ទះសម្បែង។

៣.នាង Zoul Amadou មកពីប្រទេសនីហ្សេរីយ៉ា៖នាង Amadou ត្រូវបានកំណត់ឲ្យបង្កើតប្រវត្តិសាស្ត្រជាបេក្ខនារីដំបូងគេរបស់ប្រទេសនីហ្សេរីយ៉ានៅកម្មវិធីបវរកញ្ញាចក្រវាល។ ទោះជាយ៉ាងណាក៏ដោយ ការពន្យារពេលផ្នែកភស្តុភារបានរារាំងនាងពីការទៅដល់ប្រទេសថៃទាន់ពេលវេលា ដែលបង្ខំឲ្យនាងដកខ្លួនចេញនៅដើមខែវិច្ឆិកា។
នាងបានសរសេរនៅលើ Instagram ឲ្យដឹងថា សំបុត្រយន្តហោះរបស់ខ្ញុំបានមកដល់យឺតពេលហើយ ហើយជើងហោះហើរដែលមានក៏លែងធ្វើឲ្យខ្ញុំទៅដល់ទីក្រុងបាងកកទាន់ពេលសម្រាប់ការប្រកួតដែរ។ នាងបានបន្ថែមថា អង្គការ Miss Universe បានអញ្ជើញនាងឲ្យចូលរួមប្រកួតប្រជែងក្នុងកម្មវិធីប្រកួតបវរកញ្ញាឆ្នាំ ២០២៦។

៤.នាង Sahar Biniaz មកពីប្រទេសពែរ្ស៖ពាក់កណ្តាលខែតុលា នាង Biniaz បានប្រកាសដកខ្លួនចេញពីការប្រកួត ដោយបង្ហាញពីសាមគ្គីភាពជាមួយនាយកជាតិរបស់នាង គឺនាង Golshan Barazesh ត្រូវបានឃុំខ្លួនក្នុងអំឡុងពេលទស្សនកិច្ចនៅអ៊ីរ៉ង់។ នាង Biniaz បានសរសេរនៅលើប្រព័ន្ធផ្សព្វផ្សាយសង្គមថា ដោយសារការគោរព និងការព្រួយបារម្ភយ៉ាងជ្រាលជ្រៅចំពោះសុវត្ថិភាព និងសុខុមាលភាពរបស់នាង ខ្ញុំបានធ្វើការសម្រេចចិត្តដ៏លំបាកមួយដើម្បីដកខ្លួនចេញពីការប្រកួតឆ្នាំនេះ

នេះបើយោងតាមការរាយការណ៍របស់ New York Post ថា ការប្រកួតបវរកញ្ញាចក្រវាលឆ្នាំ ២០២៥ ត្រូវបានសម្គាល់ដោយភាពចម្រូងចម្រាស។ អ្នកជំនួញថៃ និងជានាយកប្រតិបត្តិបវរកញ្ញា Nawat Itsaragrisil ត្រូវបានបណ្តេញចេញនៅដើមខែនេះ បន្ទាប់ពីបានស្តីបន្ទោសជាសាធារណៈចំពោះតំណាងប្រទេសម៉ិកស៊ិកនាង Fátima Bosch ក្នុងអំឡុងពេលពិធីប្រគល់រង្វាន់ប្រចាំឆ្នាំ ចំពោះការបដិសេធមិនចូលរួមក្នុងការថតរូបឧបត្ថម្ភ៕