ភ្នំពេញ៖លោក ឈាង សុវណ្ណរតនា អនុប្រធានសហព័ន្ធកីឡាបញ្ចស៊ីឡាត់កម្ពុជា និងលោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជាតំណាងលោក សេង ធារិន ប្រធានសហព័ន្ធ នាថ្ងៃទី២៩ ខែវិច្ឆិកា ឆ្នាំ២០២៥ នាអាកាសយានដ្ឋានអន្តរជាតិតេជោបានអញ្ជើញចូលរួមទទួលស្វាគមន៍យ៉ាងកក់ក្ដៅការវិលត្រឡប់គ្រូបង្វឹក និងកីឡាករ-កីឡាការិនីបញ្ចស៊ីឡាត់ដែលដណ្តើមមេដាយក្នុងព្រឹត្តិការណ៍ការប្រកួតកីឡាសិស្សអាស៊ាន លើកទី១៤ ជូនជាតិមាតុភូមិ នៅប្រទេសប៊្រុយណេ ដារូសាឡឹម។
ការប្រកួតកីឡាសិស្សអាស៊ាន លើកទី១៤ ឆ្នាំ២០២៥ “14th ASEAN SCHOOLS GAMES 2025 BRUNEI DARUSSALAM”នេះ កីឡាករ-កីឡាការិនីបញ្ចស៊ីឡាត់ដណ្តើមមេដាយប្រាក់ ១ គ្រឿង និងមេដាយសំរិទ្ធ ១ គ្រឿង គឺកីឡាករបញ្ចស៊ីឡាត់កម្ពុជា រ៉ៃយ៉ុង នួនមុន្នីរាជ ទទួលបានមេដាយប្រាក់ និងកីឡាករបញ្ចស៊ីឡាត់កម្ពុជា ភុក ដានីញ៉ែល ទទួលបានមេដាយសំរិទ្ធ ១ គ្រឿង។
លោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជា បានប្រាប់ឲ្យដឹងថា មេដាយទំាង ២ គ្រឿងគុណផលថ្មីមួយទៀតសម្រាប់សហព័ន្ធកីឡាបញ្ចស៊ីឡាត់កម្ពុជា ក្រោមដឹកនាំលោក សេង ធារិន ប្រធានសហព័ន្ធកីឡាបញ្ចស៊ីឡាត់កម្ពុជា ដោយលោកបានប្រឹងប្រែងជំរុញ និងខិតខំប្រមូលផ្តុំ ក្រុមកីឡាករ-កីឡាការិនីយុវជន ថ្នាលកីឡាបញ្ចស៊ីឡាត់ចូលរួមការប្រកួតកម្រិតអន្តរជាតិនៅក្រៅប្រទេស តាមរយៈក្រសួងអប់រំ យុវជន និងកីឡា ។ ការប្រកួតយុវជន អាស៊ីនៅប្រទេសប៉ារែន កីឡាករបញ្ចស៊ីឡាត់កម្ពុជា ភុក ដានីញ៉ែល ក៏បានដណ្តើមេដាយសំរិទ្ធជូនកម្ពុជា។
កម្ពុជាបានបញ្ជូនកីឡា ៣ ប្រភេទរួមមានអត្តពលកម្ម កីឡាវូស៊ូ និងកីឡាបញ្ចស៊ីឡាត់ដែលមានចំនួនកីឡាករ-កីឡាការិនីចំនួន ២០ នាក់។ ក្រុមកីឡាបញ្ចស៊ីឡាត់ចំនួន ៨ នាក់ រួមមានលោក វី តារ៉ា ជាគ្រូបង្វឹក លោក អឿន រស្មី ជាគ្រូជំនួយ កីឡាការិនី វុទ្ធី សុខរក្សា កីឡាការិនី សយ សុម៉ាលីណា កីឡាករ ភុក ដានីញ៉ែល កីឡាករ រ៉ៃយ៉ុង នួនមុន្នីរាជ កីឡាករ រ៉ៃយ៉ុង ហ្វីលីប និងកីឡាករ ពេញពិសិដ្ឋ។
លោក កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជា លោក ប៉ុន សុខ អគ្គនាយកកីឡា និងជាអគ្គលេខាធិការសហព័ន្ធកីឡាសិស្ស និស្សិតកម្ពុជា និងលោក ព្រំ ប៊ុណ្ណយី នាយបេសកកម្ម បានដឹកនាំគណៈប្រតិភូកម្ពុជាចំនួន ២៨ នាក់ចូលរួមការប្រកួតកីឡាសិស្សអាស៊ាន លើកទី១៤ ឆ្នាំ២០២៥ “14th ASEAN SCHOOLS GAMES 2025 BRUNEI DARUSSALAM”នៅប្រទេសប៊្រុយណេ ដារូសាឡឹម ៕
ដោយ៖លី ភីលីព
