ប្រ៊ុយណេ៖ប្រទេសកម្ពុជាឈរលំដាប់លេខ ៩ នៃតារាងមេដាយការប្រកួត ខណៈប្រទេសឥណ្ឌូនេស៊ីឈរកំពូលតារាងមេដាយនៃព្រឹត្តិការណ៍ការប្រកួតកីឡាសិស្សអាស៊ាន លើកទី១៤ “14th ASEAN SCHOOLS GAMES 2025 BRUNEI DARUSSALAM” ដែលប្រព្រឹត្តទៅចាប់ពីថ្ងៃទី២០ ដល់ថ្ងៃទី២៩ ខែវិច្ឆិកា ឆ្នាំ២០២៥ នៅប្រទេសប៊្រុយណេ ដារូសាឡឹម។
លោក ប៉ុន សុខ អគ្គនាយកកីឡា និងជាអគ្គលេខាធិការសហព័ន្ធកីឡាសិស្ស និស្សិតកម្ពុជាតំណាងឲ្យលោក កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជា លោក ឈាង សុវណ្ណរតនា អនុប្រធានសហព័ន្ធកីឡាបញ្ចស៊ីឡាត់កម្ពុជា និងលោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជាតំណាងលោក សេង ធារិន ប្រធានសហព័ន្ធ នាថ្ងៃទី២៩ ខែវិច្ឆិកា ឆ្នាំ២០២៥ បានអញ្ជើញចូលរួមទទួលស្វាគមន៍យ៉ាងកក់ក្ដៅការវិលត្រឡប់គ្រូបង្វឹក កីឡាករ-កីឡាការិនីបញ្ចស៊ីឡាត់ក្នុងព្រឹត្តិការណ៍ការប្រកួតកីឡាសិស្សអាស៊ាន លើកទី១៤ ជូនជាតិមាតុភូមិ នៅប្រទេសប៊្រុយណេ ដារូសាឡឹម នាអាកាសយានដ្ឋានអន្តរជាតិតេជោ។
កម្ពុជាឈរលំដាប់លេខ ៩ នាពេលនេះ នៅពេលក្រុមកីឡាបញ្ចស៊ីឡាត់កម្ពុជាដណ្តើមមេដាយ ២ គ្រឿង គឺមេដាយប្រាក់ ១ គ្រឿង ដោយកីឡាករបញ្ចស៊ីឡាត់កម្ពុជា រ៉ៃយ៉ុង នួនមុន្នីរាជ និងមេដាយសំរិទ្ធ ១ គ្រឿងដោយកីឡាករបញ្ចស៊ីឡាត់កម្ពុជា ភុក ដានីញ៉ែល។ កម្ពុជាបានបញ្ជូនកីឡា ៣ ប្រភេទរួមមានអត្តពលកម្ម កីឡាវូស៊ូ និងកីឡាបញ្ចស៊ីឡាត់ដែលមានចំនួនកីឡាករ-កីឡាការិនីចំនួន ២០ នាក់។ ក្រុមកីឡាបញ្ចស៊ីឡាត់ចំនួន ៨ នាក់ រួមមានលោក វី តារ៉ា ជាគ្រូបង្វឹក លោក អឿន រស្មី ជាគ្រូជំនួយ កីឡាការិនី វុទ្ធី សុខរក្សា កីឡាការិនី សយ សុម៉ាលីណា កីឡាករ ភុក ដានីញ៉ែល កីឡាករ រ៉ៃយ៉ុង នួនមុន្នីរាជ កីឡាករ រ៉ៃយ៉ុង ហ្វីលីប និងកីឡាករ ពេញពិសិដ្ឋ។
លោក កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជា លោក ប៉ុន សុខ អគ្គនាយកកីឡា និងជាអគ្គលេខាធិការសហព័ន្ធកីឡាសិស្ស និស្សិតកម្ពុជា និងលោក ព្រំ ប៊ុណ្ណយី នាយបេសកកម្ម បានដឹកនាំគណៈប្រតិភូកម្ពុជាចំនួន ២៨ នាក់ចូលរួមការប្រកួតកីឡាសិស្សអាស៊ាន លើកទី១៤ ឆ្នាំ២០២៥ “14th ASEAN SCHOOLS GAMES 2025 BRUNEI DARUSSALAM”នៅប្រទេសប៊្រុយណេ ដារូសាឡឹម ៕
ដោយ៖លី ភីលីព
