អាមេរិក៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា កាលពីថ្ងៃចន្ទ មហាសេដ្ឋីបច្ចេកវិទ្យាយក្សអាមេរិកលោក Elon Musk បានក្លាយជាមនុស្សដំបូងគេដែលធ្លាប់មានទ្រព្យសម្បត្តិ ៦០០ ពាន់លានដុល្លារអាមេរិក បន្ទាប់ពីមានរបាយការណ៍ថា ក្រុមហ៊ុន SpaceX របស់លោកទំនងជានឹងចេញលក់ជាសាធារណៈក្នុងតម្លៃ ៨០០ ពាន់លានដុល្លារ។
នេះបើយោងតាមការចុះផ្សាយរបស់ Reuters កាលពីសប្តាហ៍មុនបានចេញផ្សាយថា លោក Musk ជាមនុស្សដំបូងគេដែលលើសពីទ្រព្យសម្បត្តិសុទ្ធ ៥០០ ពាន់លានដុល្លារកាលខែតុលា មានភាគហ៊ុនប្រមាណ ៤២ ភាគរយក្នុងក្រុមហ៊ុន SpaceX ដែលកំពុងរៀបចំចេញលក់ជាសាធារណៈនៅឆ្នាំក្រោយ។
នេះបើយោងតាម Forbes បានបញ្ជាក់ថា ការវាយតម្លៃ SpaceX នឹងពង្រឹងទ្រព្យសម្បត្តិរបស់លោក Musk ចំនួន ១៦៨ ពាន់លានដុល្លារ ដល់ប្រមាណ ៦៧៧ ពាន់លានដុល្លារ គិតត្រឹមម៉ោង ១២ រសៀល ET នៅថ្ងៃចន្ទ។
ទ្រព្យសម្បត្តិរបស់លោក Musk ក៏ទទួលបានការជំរុញពីភាគហ៊ុនប្រហែល ១២ ភាគរយរបស់លោកក្នុងក្រុមហ៊ុនផលិតរថយន្តអគ្គិសនី Tesla ដែលភាគហ៊ុនបានកើនឡើង ១៣ ភាគរយ រហូតមកដល់ពេលនេះនៅឆ្នាំនេះ ទោះបីជាការលក់ធ្លាក់ចុះក៏ដោយ។ ពួកគេបានកើនឡើងជិត ៤ ភាគរយ នៅថ្ងៃចន្ទ បន្ទាប់ពីលោក Musk បាននិយាយថា ក្រុមហ៊ុនកំពុងសាកល្បង Robotaxis ដោយគ្មានឧបករណ៍ត្រួតពិនិត្យសុវត្ថិភាពនៅកៅអីអ្នកដំណើរខាងមុខ។
កាលខែវិច្ឆិកា ភាគទុនិក Tesla បានអនុម័តផែនការបើកប្រាក់ចំនួន ១ ពាន់ពាន់លានដុល្លារសម្រាប់លោក Musk ជាកញ្ចប់បើកប្រាក់ដ៏ធំបំផុតក្នុងប្រវត្តិសាស្ត្រ ខណៈវិនិយោគិនបានគាំទ្រចក្ខុវិស័យរបស់លោកក្នុងការប្រែក្លាយក្រុមហ៊ុនផលិតរថយន្តអគ្គិសនី (EV) ទៅជាក្រុមហ៊ុន AI និងមនុស្សយន្តដ៏ធំមួយ។
នេះបើយោងតាមរបាយការណ៍ប្រព័ន្ធផ្សព្វផ្សាយថា ជាងនេះទៅទៀត ក្រុមហ៊ុនចាប់ផ្តើមអាជីវកម្មបញ្ញាសិប្បនិម្មិត xAI របស់លោកកំពុងស្ថិតក្នុងការចរចាកម្រិតខ្ពស់ដើម្បីរៃអង្គាសប្រាក់ចំនួន ១៥ ពាន់លានដុល្លារនៅភាគហ៊ុនថ្មីក្នុងតម្លៃ ២៣០ ពាន់លានដុល្លារ៕
