អាមេរិក ៖ នាយកប្រតិបត្តិក្រុមហ៊ុន បាននិយាយថា សាជីវកម្មអាកាសចរណ៍អឺរ៉ុប Airbus បានសម្រេចចិត្តផ្លាស់ប្តូរប្រព័ន្ធឌីជីថលសំខាន់ៗចេញពីសេវាកម្ម Cloud របស់ ក្រុមហ៊ុន Google ខណៈការសម្រេចចិត្តនេះ ត្រូវបានជំរុញ ដោយក្តីបារម្ភអំពីសន្តិសុខ និងអធិបតេយ្យភាពទិន្នន័យ ដែលភ្ជាប់ទៅនឹងយុត្តាធិការ របស់អាមេរិកលើព័ត៌មាន ឧស្សាហកម្មរសើប យោងតាមការចេញផ្សាយពីគេហទំព័រ RT ។
នេះបើយោងតាម Bloomberg បាននិយាយថា ការសម្រេចចិត្តនេះកើតឡើង នៅពេល Google ប្រឈមមុខនឹងបណ្តឹងប្តឹងជាក្រុមនៅអាមេរិក ជុំវិញការរំលោភបំពានលើភាព ឯកជនជាប់ទាក់ទងនឹងជំនួយការ AI របស់ខ្លួនគឺ Gemini។ បណ្តឹងនេះអះអាងថា ឧបករណ៍នេះត្រូវបានធ្វើឲ្យ សកម្មដោយស្ងាត់ៗ នៅទូទាំង Gmail, Chat និង Meet ខែតុលា ដែលផ្តល់ឲ្យ Google នូវសិទ្ធិចូលប្រើអ៊ីម៉ែល ឯកសារភ្ជាប់ និងការហៅជាវីដេអូដោយគ្មាន ការយល់ព្រមពីអ្នកប្រើប្រាស់ ។ Google បានបដិសេធការចោទប្រកាន់នេះ។
Airbus កំពុងរៀបចំដេញថ្លៃកិច្ចសន្យាដ៏សំខាន់មួយ ដើម្បីផ្លាស់ទីបន្ទុកការងារសំខាន់ៗ ទៅកាន់ពពកអធិបតេយ្យភាពឌីជីថលរបស់អឺរ៉ុប។ ក្រុមហ៊ុននេះ ដែលបច្ចុប្បន្នប្រើប្រាស់ Google Workspace មានគម្រោងផ្លាស់ប្តូរប្រព័ន្ធសំខាន់ៗ នៅនឹងកន្លែង បន្ទាប់ពីបានបង្រួបបង្រួមអចលនទ្រព្យ មជ្ឈមណ្ឌលទិន្នន័យរបស់ខ្លួន។
ការផ្លាស់ប្តូរនេះនឹងគ្របដណ្តប់លើប្រព័ន្ធស្នូល រួមទាំងផលិតកម្ម ការគ្រប់គ្រងអាជីវកម្ម និងទិន្នន័យរចនាយន្តហោះ។ ក្រុមហ៊ុន Airbus បានប៉ាន់ប្រមាណថាមានឱកាសត្រឹមតែ ៨០ភាគរយប៉ុណ្ណោះក្នុងការស្វែងរកអ្នកផ្តល់សេវាអឺរ៉ុបដែលមានសមត្ថភាពបំពេញតាមតម្រូវការបច្ចេកទេស និងច្បាប់របស់ខ្លួន។
លោកស្រី Catherine Jestin អនុប្រធានប្រតិបត្តិផ្នែកឌីជីថលរបស់ក្រុមហ៊ុន Airbus បានប្រាប់ The Register ថា ខ្ញុំត្រូវការ Cloud ឯកជនភាព ពីព្រោះផ្នែកមួយនៃព័ត៌មានមានភាពរសើបខ្លាំងពីទស្សនៈជាតិ និងអឺរ៉ុប ។ យើងចង់ធានាថាព័ត៌មាននេះនៅតែស្ថិតនៅក្រោមការគ្រប់គ្រងរបស់អឺរ៉ុប៕
