អស្ចា្យបំផុត៖ អ្នកជំនួញថៃម្នាក់ត្រូវកាត់ទោសឲ្យជាប់ពន្ធនាគារជាង ៨០៦ ឆ្នាំពីបទក្លែងបន្លំប្រាក់កម្ចីយ៉ាងច្រើនបំផុត

ថៃ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា អ្នកជំនួញជនជាតិថៃ លោក Prasit Jeawkok ត្រូវបានកាត់ទោសឲ្យជាប់ពន្ធនាគារ ៨០៦ ឆ្នាំ និង ៨ ខែ ពីបទដំណើរការគម្រោងប្រាក់កម្ចីក្លែងបន្លំទ្រង់ទ្រាយធំ ដែលបានបោកប្រាស់វិនិយោគិនរាប់រយនាក់ ទោះបីជាក្រោមច្បាប់ថៃ លោកនឹងជាប់ពន្ធនាគារត្រឹមតែ ២០ ឆ្នាំក៏ដោយ។

នេះបើយោងតាមការចុះផ្សាយរបស់ Bangkok Post បាននិយាយថា តុលាការព្រហ្មទណ្ឌនៅថ្ងៃទី ២៥ ខែធ្នូ បានសម្រេចថា លោក Prasit អតីតប្រធានគម្រោងប្រគល់សេចក្តីល្អដល់ដី បានបោកប្រាស់សាធារណជនដោយល្បួងជនរងគ្រោះឲ្យចូលទៅក្នុងកម្មវិធីប្រាក់កម្ចី និងវិនិយោគខុសច្បាប់តាមរយៈក្រុមហ៊ុនរបស់គាត់គឺ Nuea Lok និង Web Sawasdee Public ។

ព្រះរាជអាជ្ញាបាននិយាយថា គម្រោងនេះបានរំលោភលើច្បាប់ខ្ចីប្រាក់សាធារណៈ និងច្បាប់ឧក្រិដ្ឋកម្មកុំព្យូទ័រ ដោយអ្នកស៊ើបអង្កេតបានរកឃើញថា ប្រតិបត្តិការរីករាលដាលទាក់ទាញមនុស្សមួយចំនួនធំ។ តុលាការបានផ្តន្ទាទោសលោក Prasit ពីបទក្លែងបន្លំចំនួន ២៤២ ករណី ដែលម្នាក់ៗមានទោស ៥ ឆ្នាំ បូកបញ្ចូលគ្នារហូតដល់ ១២១០ ឆ្នាំ។ ទោះជាយ៉ាងណាក៏ដោយ ក្រោយមកតុលាការបានបន្ថយទោសរបស់គាត់មកត្រឹម ៨០៦ ឆ្នាំ និង ៨ ខែ ដោយសារគាត់សហការ។

ចុងចោទម្នាក់ទៀតឈ្មោះ Wimgrit ត្រូវបានរកឃើញថា មានទោសពីបទគាំទ្រប្រតិបត្តិការនេះ ហើយបានទទួលទោសសរុបជាង ១១១ ឆ្នាំ ក្រោយមកត្រូវបានកាត់បន្ថយមកត្រឹម ៧៤ ឆ្នាំ និង ៨ ខែ។ ទោះបីជាមានការផ្តន្ទាទោសយ៉ាងច្រើនក៏ដោយ ច្បាប់ថៃបានកំណត់រយៈពេលជាប់ពន្ធនាគារជាក់ស្តែងត្រឹម ២០ ឆ្នាំ។

តុលាការក៏បានបញ្ជាឲ្យលោក Prasit លោក Wimgrit និងក្រុមហ៊ុនទាំងពីរផ្តល់សំណងដល់ជនរងគ្រោះចំនួន ២៦៧ នាក់ផងដែរ។ នេះមិនមែនជាការកាត់ទោសលើកដំបូងរបស់លោក Prasit ទេ។ ខែកក្កដា ឆ្នាំ ២០២៣ គាត់ត្រូវបានកាត់ទោសឲ្យជាប់ពន្ធនាគាររយៈពេល ១.១៥៥ ឆ្នាំក្នុងករណីក្លែងបន្លំដាច់ដោយឡែកមួយ ដែលក៏កំណត់ត្រឹម ២០ ឆ្នាំផងដែរ ហើយត្រូវបានបញ្ជាឲ្យសងប្រាក់វិញជាងមួយពាន់លានបាត។

កាសែត The Nation បានរាយការណ៍ថា ក្រុមហ៊ុនទាំង ២ ក៏ត្រូវបានពិន័យជាប្រាក់ចំនួន ១២១ លានបាត (៣,៨៧ លានដុល្លារ) ក្នុងមួយក្រុមហ៊ុនផងដែរ ដែលក្រោយមកត្រូវបានកាត់បន្ថយមកត្រឹមប្រហែល ៨០ លានបាតដោយសារតែកិច្ចសហប្រតិបត្តិការមួយផ្នែក៕