ភ្នំពេញ៖លោក Benjamin Chiang ភារធារីស្តីទី នៃស្ថានទូតសហរដ្ឋអាមេរិក ប្រចាំព្រះរាជាណាចក្រកម្ពុជា បានមានប្រសាសន៍ថា ការចុះហត្ថលេខា លើអនុស្សរណៈនៃការយោគយល់គ្នា ដើម្បីបើកដំណើរការ យុទ្ធនាការឧបត្ថម្ភកីឡាអូឡាំពិក Los Angeles ឆ្នាំ២០២៨ នៅអាមេរិកនេះតំណាង ឲ្យជំហានដ៏សំខាន់ មួយឆ្ពោះទៅមុខក្នុងការពង្រឹងឱកាសកីឡា និងអាជីវកម្មរវាងប្រទេសយើងទាំង២ អបអរសាទរឧត្តមភាពរួមគ្នារបស់យើង និងពង្រីកចំណងមិត្តភាពរវាងប្រជាជន និងប្រជាជន ។
លោក Benjamin Chiang បានលើកឡើងក្នុងឱកាសពិធីការចុះហត្ថលេខាលើ អនុស្សរណៈនៃការយោគយល់គ្នា (MoU)នេះ ដោយមានការអញ្ជើញចូលរួមពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពជា (NOCC)តំណាងលោកបណ្ឌិតទេសរដ្ឋមន្ដ្រី ថោង ខុនប្រធានគណៈកម្មាធិការជាតិអូឡាំពិក លោក ខេស៊ី បាណេត ប្រធាន សមាគមសភាពាណិជ្ជកម្មអាមេរិកនៅកម្ពុជា (AmCham) ព្រមទាំងអ្នកតំណាងសហព័ន្ធកីឡាជាតិ។
លោក Benjamin Chiang បានបញ្ជាក់ថា យើងខ្ញុំមានការរំភើបរីករាយដែលបានឃើញ AmCham បន្តតួនាទីរបស់ខ្លួនជាអ្នកដឹកនាំសហគមន៍ដោយបម្រើការជាឯកអគ្គរដ្ឋទូតយុទ្ធនាការសម្រាប់កម្មវិធីរៃអង្គាសថវិកា LA Olympic Games 2028 ។
កិច្ចខិតខំប្រឹងប្រែងរបស់អ្នកបង្ហាញពីការគាំទ្រយ៉ាងច្បាស់លាស់របស់សហគមន៍ធុរកិច្ចអាមេរិកចំពោះអត្តពលិកកម្ពុជា និងស្មារតីឧត្តមភាព និងមិត្តភាពអូឡាំពិក។ ការប្រកួតកីឡាអូឡាំពិក និងប៉ារ៉ាឡាំពិករដូវក្តៅឆ្នាំ២០២៨ នៅទីក្រុងឡូសអាន់ជឺឡេស (LA28) រួមជាមួយនឹងព្រឹត្តិការណ៍កីឡាធំៗ ផ្សេងទៀត នឹងទាក់ទាញអ្នកទស្សនារាប់លាននាក់ មកពីជុំវិញពិភពលោក និងទាក់ទាញចំណាប់អារម្មណ៍ របស់អ្នកទស្សនារាប់ពាន់លាននាក់។
លោកភារធារីស្តីទី នៃស្ថានទូតសហរដ្ឋអាមេរិក បានបន្តថា កីឡាគឺជាផ្នែកសំខាន់មួយ នៃវប្បធម៌អាមេរិក ហើយជាផ្នែកមួយ នៃកិច្ចខិតខំប្រឹងប្រែង របស់យើងក្នុង ការលើកកម្ពស់សន្តិភាព និងបង្កើតទំនាក់ទំនង ឆ្លងវប្បធម៌ជុំវិញពិភពលោក ក្នុងរយៈពេល ២៥០ ឆ្នាំកន្លងមកនេះ ។ កីឡានាំយើងមកជួបជុំគ្នា រំលឹកយើងអំពីតម្លៃរួម របស់យើង និង លើកកម្ពស់សុច្ឆន្ទៈ និងការប្រកួតប្រជែងមិត្តភាព រវាងប្រជាជន ។ ការប្រកួតកីឡាអូឡាំពិក និងប៉ារ៉ាឡាំពិករដូវក្តៅឆ្នាំ ២០២៨ នៅទីក្រុងឡូសអាន់ជឺឡេស ដែលជាការប្រកួត កីឡារដូវក្តៅ លើកដំបូង ដែលរៀបចំឡើង នៅសហរដ្ឋអាមេរិក ក្នុងរយៈពេលជាង៣០ឆ្នាំ គឺជាឱកាសដ៏ល្អ សម្រាប់ប្រទេស របស់យើងក្នុងការបង្ហាញ ពីចំណង់ចំណូលចិត្តរួមគ្នា របស់យើងចំពោះការប្រកួតប្រជែងដែលមានសុខភាពល្អ សេចក្តីស្រឡាញ់ចំពោះកីឡា និងការរួមរស់ដោយសន្តិភាព។
លោក Benjamin Chiang បានបន្ថែមថា ការប្រកួតកីឡាអូឡាំពិកក៏នឹងក្លាយ ជាឱកាសដ៏ល្អសម្រាប់ប្រទេស របស់យើងក្នុងការអភិវឌ្ឍទំនាក់ទំនងអាជីវកម្មផងដែរ ។ ទីក្រុងឡូសអាន់ជឺឡេសគឺ ជាចំណុចកណ្តាលសកល នៃភាពច្នៃប្រឌិត នវានុវត្តន៍ និង ភាពរស់រវើកផ្នែកសេដ្ឋកិច្ច ហើយការ ប្រកួតកីឡានេះបង្ហាញ ពីបរិយាកាសដ៏ល្អមួយ ដើម្បីស្វែងយល់ពីឱកាសសេដ្ឋកិច្ចរួមគ្នា ។ ការប្រកួតកីឡានេះនឹងមិនត្រឹមតែបង្ហាញពីភាពច្នៃប្រឌិត និងភាពស្វាហាប់របស់អាមេរិកប៉ុណ្ណោះទេ ប៉ុន្តែវាក៏នឹងបើកទ្វារសម្រាប់សហគ្រិន វិនិយោគិន និងអាជីវកម្មកម្ពុជា ដើម្បីភ្ជាប់ទំនាក់ទំនងជាមួយដៃគូអាមេរិក ស្វែងយល់ពីទីផ្សារថ្មីៗ និងកសាងទំនាក់ទំនងសេដ្ឋកិច្ចយូរអង្វែង ដែលនឹងធ្វើឱ្យទាំងអាមេរិក និងកម្ពុជាកាន់តែមានវិបុលភាព។
