វៀតណាម៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ចាប់ពីថ្ងៃទី ១ ខែមករា ឆ្នាំ ២០២៧ បន្ទាប់ពីវិសោធនកម្មច្បាប់ស្តីពីពន្ធ លើការប្រើប្រាស់ពិសេស បារីនឹងត្រូវបង់ពន្ធលើអត្រាពន្ធថេរ ដែលនឹងកើនឡើង ជាលំដាប់ជារៀងរាល់ឆ្នាំ នេះហើយជាវិសោធនកម្ម ដែលបានអនុម័តកាលពីខែមិថុនា ឆ្នាំមុនបានចូលជាធរមាននៅថ្ងៃទី ១ ខែមករា។
ចាប់ពីថ្ងៃទី ១ ខែមករា ឆ្នាំ ២០២៧ បារីនឹងត្រូវបង់ទាំង អត្រាពន្ធបច្ចុប្បន្ន ៧៥ ភាគរយ និងចំនួនពន្ធថេរដែលនឹង កើនឡើងជាលំដាប់ពី ២.០០០ ដុងក្នុងមួយកញ្ចប់ក្នុងឆ្នាំ ២០២៧ ដល់ ១០.០០០ ដុងក្នុងឆ្នាំ ២០៣១។
សន្និសីទពិគ្រោះយោបល់ សម្រាប់វិសោធនកម្ម និងសេចក្តីបន្ថែមនៃច្បាប់ស្តីពីការបង្ការ និងការគ្រប់គ្រងគ្រោះថ្នាក់ថ្នាំ ជក់នៅថ្ងៃទី ១៣ ខែមករា លោកស្រី Phan Thi Hai អនុប្រធានមូលនិធិបង្ការគ្រោះថ្នាក់ថ្នាំជក់ បាននិយាយថា ពន្ធលើបារីត្រូវបានដំឡើងពីរដងចាប់តាំងពីឆ្នាំ ២០១៣ ពី ៦៥ ភាគរយ ដល់ ៧០ ភាគរយនៅឆ្នាំ ២០១៦ និងដល់ ៧៥ ភាគរយក្នុងឆ្នាំ ២០១៩។
ប៉ុន្តែទាំងនេះបានបរាជ័យ ក្នុងការបង្កើតផលប៉ះពាល់ច្បាស់លាស់លើឥរិយាបថជក់បារី ជាពិសេសដោយសារ ប្រាក់ចំណូលបានកើនឡើង យ៉ាងឆាប់រហ័ស ខណៈតម្លៃបារីបានកើនឡើងតិចតួចប៉ុណ្ណោះ ដូច្នេះហើយទើបមានការ សម្រេចចិត្តបង្កើនពន្ធជាបន្តបន្ទាប់នាពេលអនាគត។
កាសែតផ្លូវការរបស់ក្រសួងសុខាភិបាល Suc Khoe Doi Song បានរាយការណ៍ថា ឆ្នាំ ២០១២-២០២៥ ចំណែកនៃពន្ធលើតម្លៃលក់រាយបារី មានត្រឹមតែ ៣៦,៨ ភាគរយប៉ុណ្ណោះ ដែលទាបជាងកម្រិតបានណែនាំ របស់អង្គការសុខភាពពិភពលោក ៧០-៧៥ភាគរយ និងប្រហែលពាក់កណ្តាល នៃកម្រិតក្នុងប្រទេសអាស៊ីអាគ្នេយ៍ ដូចជាប្រទេសថៃ (៧៨,៦ ភាគរយ) និងសិង្ហបុរី (៦៧,១ ភាគរយ)។
នេះជាហេតុផលមួយដែលធ្វើឲ្យគោលដៅ កាត់បន្ថយអត្រារីករាលដាល នៃការជក់បារី ជាពិសេសក្នុងចំណោមបុរស មិនត្រូវបានសម្រេច។ ច្បាប់ស្តីពីការបង្ការ និងការគ្រប់គ្រងគ្រោះថ្នាក់ពីថ្នាំជក់មានសុពលភាព អស់រយៈពេល ១៣ ឆ្នាំមកហើយ។
យោងតាមរបាយការណ៍ របស់ក្រសួងសុខាភិបាលថា យុទ្ធនាការទំនាក់ទំនង យ៉ាងទូលំទូលាយ បានជួយបង្កើនការយល់ដឹង ជាសាធារណៈអំពីគ្រោះថ្នាក់ដែលបណ្តាលមកពីការជក់បារី និងផ្សែងបារី៕
