ភ្នំពេញ៖ អ្នកប្រដាល់កម្ពុជា ឡៅ ចន្រ្ទា ក្លិបកងពលតូចទ័ពឆ័ត្រយោង ៩១១ ប៉ះអ្នកប្រដាល់ឆ្លងដែនជើងខ្លាំងថៃ Pheach Aroun ក្នុងប្រភេទម្ងន់៦៩គីឡូក្រាមនាព្រឹកថ្ងៃអាទិត្យ ទី១៦ ខែកុម្ភៈ ឆ្នាំ ២០២០ នេះ នៅសង្វៀន Boostrong Fighter On Fចចire របស់ SEATV ។
លោក ញាណ សុធី អ្នកចាត់ចែងកម្មវិធីប្រដាល់ប្រចាំ SEATV បានឲ្យដឹងថា អ្នកប្រដាល់ថៃរូបនេះ ខ្លាំងមិនធម្មតានោះទេ បើតាមប្រវត្តិ Pheach Aroun ល្អ និងខ្លាំង ដែលមិនអាចមើលស្រាលបានឡើយ។ អ្នកប្រដាល់ថៃនេះ ជាជើងខ្លាំងទម្ងន់៦៩គីឡូក្រាមប្រចាំនៅស្រុកថៃ ដោយសាររូបគេមានផ្លែមុតស្រួចល្អ ទាំងកណ្ដាប់ដៃ ទាត់ និង ជង្គង់ ហើយថែមទាំងស៊ូចំពោះការប្រកួតទៀតផង។ Pheach Aroun ប្រកួត១០៣លើក ឈ្នះ៩១លើក ចាញ់១២លើក និងមិនដែរស្មើ ។
សម្រាប់ការប្រកួតលើកនេះ Pheach Aroun ប៉ះជាមួយឡៅ ចន្រ្ទា ជាម្ចាស់មេដាយសំរិទ្ធនៃព្រឹត្តិការណ៍ការប្រកួតកីឡា SEA GAMES លើកទី៣០ ឆ្នាំ២០១៩នៅប្រទេសហ្វីលីពីន។ ឡៅ ចន្រ្ទា ប្រដាល់គុនខ្មែរគេក៏ខ្លាំង និងវាយមិនចេះខ្លាចនោះដែរ។ មួយវិញទៀត ឡៅ ចន្រ្ទាមានផ្លែល្អ ពិសេស គឺផ្លែកែង និងកណ្ដាប់ដៃ ហើយសោភ័ណ្ឌ នៅមានស្នៀតទាត់ល្អ ខ្លាំង និងធ្ងន់ថែមទៀត។
ចំណែកបញ្ហាកម្លាំងកាយសម្បទាវិញ ឡៅ ចន្រ្ទា ក៏រឹងមាំមិនងាយស្រុតខ្សោយនោះដែរ។ឡៅ ចន្រ្ទាប្រកួតចំនួន១២២លើក ឈ្នះ១០៦លើក ចាញ់១១លើក និងស្មើ៤លើក ហើយធ្លាប់ផ្តួលគូប្រកួតឲ្យសន្លប់លើរេញជាច្រើនលើក៕ ដោយ៖លី ភីលីព
