មូស្គូ៖ ការវាយប្រហារដោយយន្តហោះ គ្មានមនុស្សបើកដ៏មានឥទ្ធិពល និងធំធេងបំផុត ត្រូវបានធ្វើឡើងដោយយោធា អ៊ុយក្រែននៅក្នុងតំបន់ Bryansk របស់រុស្ស៊ី ចាប់តាំងពីការចាប់ផ្តើមនៃជម្លោះ ដោយបានបំផ្លាញហេដ្ឋារចនាសម្ព័ន្ធថាមពល នេះបើយោងតាមអភិបាលតំបន់ លោក Alexander Bogomaz ។
លោកបានបន្ថែមទៀតថា ការវាយប្រហារទាំងនេះមានរយៈពេលជាង ១២ ម៉ោងចាប់ពីព្រឹកថ្ងៃទី ១៥ ខែកុម្ភៈ រហូតដល់ម៉ោងប្រហែល ៨:០០ យប់ ម៉ោងក្នុងស្រុក ខណៈដែលកងកម្លាំងរុស្ស៊ី បានស្ទាក់ចាប់ និងបំផ្លាញយន្តហោះគ្មានមនុស្សបើកស្លាបថេរជាង ១៧០ គ្រឿងក្នុងអំឡុងពេលនោះ។
លោកបានបន្ថែមថា យន្តហោះគ្មានមនុស្សបើកសរុបចំនួន ២២៩ គ្រឿងត្រូវបានបំផ្លាញក្នុងរយៈពេល ២៤ ម៉ោងនៅក្នុងតំបន់នេះ ដោយចាប់ផ្តើមពីម៉ោង ៨:០០ ព្រឹកនៅថ្ងៃទី ១៥ ខែកុម្ភៈ។
លោកបានលេីកឡេីងថា ការវាយប្រហារទាំងនេះបានបំផ្លាញកន្លែងផ្គត់ផ្គង់ថាមពលជាច្រើន ដោយរំខានដល់សេវាកម្មអគ្គិសនី និងកំដៅជាបណ្ដោះអាសន្ននៅក្នុងស្រុកក្រុងចំនួន៥ នៃតំបន់ និងផ្នែកខ្លះនៃរដ្ឋធានីក្នុងតំបន់ ដោយបានកត់សម្គាល់ថា ក្រុមសង្គ្រោះបន្ទាន់បានស្តារថាមពល និងកំដៅឡើងវិញបន្ទាប់ពីប្រហែល ៣ម៉ង ដោយជួសជុលហេដ្ឋារចនាសម្ព័ន្ធ និងធ្វើឱ្យប្រព័ន្ធបម្រុងទុកសកម្មឡេីងវិញ។
យោធាអ៊ុយក្រែនក៏បានវាយប្រហារតំបន់ផ្សេងទៀតរវាងថ្ងៃទី១៥ និង ១៦ ខែកុម្ភៈផងដែរ។ នៅក្នុងតំបន់ Belgorod យន្តហោះគ្មានមនុស្សបើកចំនួន ៨៨ គ្រឿងត្រូវបានរកឃើញក្នុងរយៈពេល ២៤ ម៉ោងកន្លងមក ដែលក្នុងនោះ ៥១គ្រឿងត្រូវបានបាញ់ទម្លាក់៕
ប្រែសម្រួល ឈូក បូរ៉ា
