Las Vegas៖នេះបើយោងតាមការប្រកាសរបស់ Netflix កាលពីថ្ងៃចន្ទ បានប្រាប់ឲ្យដឹងថា អ្នកប្រដាល់ជើងខ្លាំង Floyd Mayweather និងស្តេចប្រដាល់ជនជាតិហ្វីលីពីន Manny Pacquiao នឹងជួបគ្នាក្នុងការប្រកួតអាជីពនៅ Sphere ទីក្រុង Las Vegas ខែកញ្ញាខាងមុខនេះ យោងតាមការចេញផ្សាយពីគេហទំព័រ VN Express ។
ព័ត៌មានអំពីការប្រកួតរវាងអ្នកប្រដាល់ល្បីឈ្មោះ ២ នាក់ ដែលធ្លាប់បានប្រកួតគ្នាយ៉ាងស្វិតស្វាញក្នុងឆ្នាំ ២០១៥ បានកើតឡើងប៉ុន្មានថ្ងៃបន្ទាប់ពី Mayweather អាយុ ៤៨ ឆ្នាំបានប្រកាសថា គាត់នឹងចូលនិវត្តន៍ ហើយនឹងត្រូវបានផ្សាយផ្ទាល់នៅលើវេទិកាផ្សាយផ្ទាល់សកល។
ស្តេចប្រដាល់ជនជាតិហ្វីលីពីន Pacquiao អាយុ ៤៧ ឆ្នាំ បាននិយាយក្នុងសេចក្តីថ្លែងការណ៍រួមមួយថា Floyd និងខ្ញុំបានផ្តល់ឲ្យពិភពលោក នូវអ្វីដែលនៅតែជាការប្រកួតដ៏ធំបំផុតក្នុងប្រវត្តិសាស្ត្រប្រដាល់។ អ្នកគាំទ្របានរង់ចាំយូរគ្រប់គ្រាន់ហើយ ពួកគេសមនឹងទទួលបានការប្រកួតឡើងវិញនេះ។
អ្នកប្រដាល់ Mayweather បានយកឈ្នះលោក Pacquiao ការប្រកួត “Fight of the Century” ឆ្នាំ ២០១៥ ដែលរកចំណូលបានច្រើន ប៉ុន្តែភាគច្រើនមិនបានបំពេញតាមការចាប់អារម្មណ៍នោះទេ។ Mayweather ត្រូវបានគេជឿថា រកបានចំណូលប្រមាណ ៣០០ លានដុល្លារពីជ័យជម្នះដោយពិន្ទុលើតារាហ្វីលីពីនរូបនេះ នៅតែជាការប្រកួតដែលរកចំណូលបានច្រើនបំផុតក្នុងប្រវត្តិសាស្ត្រ និងរកចំណូលបានជាង ៦០០ លានដុល្លារ។
អតីតជើងឯកពិភពលោកច្រើនប្រភេទទម្ងន់ Mayweather បានចូលនិវត្តន៍ពីការប្រដាល់ក្នុងឆ្នាំ ២០១៧ ដោយមិនចាញ់ក្នុងការប្រកួតចំនួន ៥០ លើក ទោះបីជាលោកបានបន្តប្រកួតក្នុងការប្រកួតជាច្រើនចាប់តាំងពីពេលនោះមក រួមទាំងការប្រកួតនាពេលខាងមុខជាមួយ Mike Tyson នៅនិទាឃរដូវនេះ៕
