អាមេរិក៖ យោងតាមការចេញផ្សាយពីគេហទំព័រ Daily Mail បានប្រាប់ឲ្យដឹងថា រដ្ឋបាលអាកាសចរណ៍ និងអវកាសជាតិអាមេរិក “NASA” បានបង្ហាញផែនការសាងសង់មូលដ្ឋានអចិន្ត្រៃយ៍ ដែលមានតម្លៃ ២០ ពាន់លានដុល្លារ នៅលើភពព្រះច័ន្ទ បន្ទាប់ពីលោក Jared Isaacman ប្រធានថ្មីបានចូលរួមជាមួយទីភ្នាក់ងារនេះ កាលពីខែធ្នូប្រកាសពីការផ្លាស់ប្តូរការផ្តោតអារម្មណ៍ ដោយផ្តល់អាទិភាពដល់ជម្រកភព ព្រះច័ន្ទដែលធ្វើឲ្យវត្តមានរបស់មនុស្សរយៈពេលវែង។
លោក Jared Isaacman បានបន្តថា NASA នឹងចំណាយពេលប្រាំពីរឆ្នាំបន្ទាប់ ដើម្បីសាងសង់ស្ថានីយ៍នៅប៉ូលខាងត្បូង នៃឋានព្រះច័ន្ទលើបេសកកម្មរាប់សិប។ ស្នាដៃសិល្បៈនៃមូលដ្ឋាននេះមានយានរុករកអនាគត ឧបករណ៍ទំនាក់ទំនង បន្ទះសូឡា ម៉ូឌុលជម្រក និងបន្ទះបាញ់បង្ហោះនៅលើផ្ទៃភពព្រះច័ន្ទ។
លោកបានបន្ថែមថា ស្ថានីយ៍នេះនឹងតំណាងឲ្យជំហានបន្ទាប់ឆ្ពោះទៅរក “ការសម្រេចបាននូវអ្វីដែលមិនអាចទៅរួច” ហើយនឹង ធានានូវភាពជាអ្នកដឹកនាំរបស់អាមេរិកក្នុងលំហ។
លោក Isaacman បានប្រាប់សន្និសីទមួយនៅទីស្នាក់ការកណ្តាល NASA ក្នុងទីក្រុងវ៉ាស៊ីនតោនថា នឹងមានផ្លូវវិវត្តន៍មួយដើម្បីសាងសង់ប៉ុស្តិ៍អចិន្ត្រៃយ៍ដំបូងរបស់មនុស្សជាតិនៅខាងក្រៅផែនដី ហើយយើងនឹងយកពិភពលោកទៅជាមួយយើង។ លោកបានបញ្ជាក់ថា លើកនេះគោលដៅមិនមែនជាទង់ជាតិ និងស្នាមជើងទេ។
NASA បាននិយាយថា ការសាងសង់មូលដ្ឋានឋានព្រះច័ន្ទនឹងធ្វើឡើងជា ៣ ដំណាក់កាល។ ដំណាក់កាលទី ១ ៖ពាក់ព័ន្ធនឹងការផ្លាស់ប្តូរពីបេសកកម្មមិនញឹកញាប់ទៅជាវិធីសាស្រ្ត ដែលបង្កើនល្បឿននៃសកម្មភាពភពព្រះច័ន្ទ។ ដំណាក់កាលទី២ ៖នឹងឃើញការផ្លាស់ប្តូរឆ្ពោះទៅរកហេដ្ឋារចនាសម្ព័ន្ធពាក់កណ្តាលអាចរស់នៅបាន ពាក់ព័ន្ធនឹងយានរុករក និងទម្រង់ដឹកជញ្ជូនផ្សេងទៀត។
ចុងក្រោយ សម្រាប់ដំណាក់កាលទី៣ NASA នឹងផ្តល់ហេដ្ឋារចនាសម្ព័ន្ធធ្ងន់ជាងមុនដែលត្រូវការសម្រាប់ការឈរជើងរបស់មនុស្សជាបន្តបន្ទាប់នៅលើភពព្រះច័ន្ទ។ នេះនឹងរួមបញ្ចូលជម្រកពហុបំណងដែលបង្កើតឡើងដោយទីភ្នាក់ងារអវកាសអ៊ីតាលី និងយានជំនិះប្រើប្រាស់ភពព្រះច័ន្ទពីទីភ្នាក់ងារអវកាសកាណាដា៕
