ស្ត្រីជនជាតិថៃម្នាក់ ចោទប្រកាន់អតីតមិត្តប្រុសប៉ូលីស ក្លែងក្លាយបានលួចមាស និងប្រាក់ពីទូដែករបស់នាង

ថៃ៖ យោងតាមការចេញផ្សាយពីគេហទំព័រ The Thaiger បានប្រាប់ឲ្យដឹងថាស្ត្រីម្នាក់បានស្វែងរកជំនួយពីអង្គការយុត្តិធម៌សង្គមកាលពីម្សិលមិញ ទី២១ ខែមេសា បន្ទាប់ពីចោទប្រកាន់អតីតមិត្តប្រុសរបស់នាងថា បានធ្វើពុតជាមន្ត្រីប៉ូលីស ខ្ចីប្រាក់ពីនាង និងលួចមាស និងប្រាក់ពីទូដែករបស់នាង។

ស្ត្រីរូបនេះឈ្មោះ Waraporn អាយុ ៣៩ ឆ្នាំ បានជួបជាមួយ Ekaphop Lueangprasert ស្ថាបនិកអង្គការ Sai Mai Tong Rod ក្នុងទីក្រុងបាងកកកាលពីម្សិលមិញ។ នាងបានចោទប្រកាន់អតីតដៃគូរបស់នាងឈ្មោះ Thongchai អាយុ ៤២ ឆ្នាំ ថា បានធ្វើពុតជាអនុសេនីយ៍ឯកប៉ូលីសក្នុងអំឡុងពេលទំនាក់ទំនងរយៈពេលមួយឆ្នាំរបស់ពួកគេ។

នាងបានជួបបុរសនោះតាមរយៈបណ្តាញសង្គម Facebook នៅដើមឆ្នាំ ២០២៤ ហើយក្រោយមករស់នៅជាមួយគ្នា។ គាត់បានអះអាងថា គាត់ធ្លាប់បម្រើការជាឆ្មាំរាជវង្សដែលមានឋានៈអនុសេនីយ៍ឯក មុនពេលចូលរួមជាមួយប៉ូលីសជា “អនុសេនីយ៍ឯក Pop” នៅអង្គភាពប្រឆាំងគ្រឿងញៀននៃស្ថានីយ៍ប៉ូលីស Khan Na Yao។

គាត់តែងតែស្លៀកឯកសណ្ឋានប៉ូលីស ហើយធ្លាប់នាំនាងទៅប៉ុស្តិ៍ប៉ូលីស Khan Na Yao ដោយប្រាប់នាងឲ្យរង់ចាំក្នុងឡាន ខណៈដែលគាត់ចូលទៅខាងក្នុង ដែលនាំឲ្យនាងជឿថា គាត់ជាមន្ត្រីប៉ូលីសពិតប្រាកដ។

ប្រហែល ៤ ខែបន្ទាប់ពីមានទំនាក់ទំនងស្នេហា គាត់បានអះអាងថា គាត់ត្រូវបានចាត់តាំងឲ្យតាមដានអធិការម្នាក់នៅកងពលធំនគរបាលក្រុងលេខ ២ ហើយគណនីរបស់គាត់ត្រូវបានបង្កក បន្ទាប់ពីមន្ត្រីរូបនោះបានប្រើប្រាស់វាដើម្បីទទួលប្រាក់ពីគ្រឿងញៀន។

បន្ទាប់មកគាត់បានខ្ចីប្រាក់ពីនាងច្រើនដង សរុបប្រហែល ៣០,០០០ ទៅ ៤០,០០០ បាត។ អ្នកនាង Waraporn ក៏បានចោទប្រកាន់គាត់ពីបទផ្ជុងកាំភ្លើងទៅក្បាលនាងក្នុងពេលឈ្លោះប្រកែកគ្នា វាយប្រហារនាង និងរក្សាទុកគ្រឿងញៀនក្នុងកាបូបរបស់គាត់ ៕