តូក្យូ៖ អ្នកឆ្លើយតបជាងពាក់កណ្តាល នៅក្នុងការស្ទង់មតិថ្មីៗនេះរបស់ជប៉ុន បានប្រឆាំងនឹងការសម្រេចចិត្ត របស់រដ្ឋាភិបាលក្នុងការលើកលែង ការរឹតបន្តឹងលើការនាំចេញអាវុធប្រល័យលោក។ ការស្ទង់មតិមួយដែលចេញផ្សាយដោយ Kyodo News កាលពីថ្ងៃអាទិត្យបានបង្ហាញថា ៥៧,២ ភាគរយនៃអ្នកឆ្លើយតបបានបដិសេធការអនុញ្ញាតឱ្យនាំចេញអាវុធប្រល័យលោក ខណៈដែល ៣៧,១ ភាគរយគាំទ្រ។
ការស្ទង់មតិមួយផ្សេងទៀតដែលធ្វើឡើងដោយប្រព័ន្ធផ្សព្វផ្សាយសាធារណៈ NHK ចាប់ពីថ្ងៃទី៨ ដល់ថ្ងៃទី១០ ខែឧសភា បានរកឃើញថា ៥២ ភាគរយនៃអ្នកឆ្លើយតបបានប្រឆាំងនឹងចលនារបស់រដ្ឋាភិបាល ក្នុងការបើកទ្វារឱ្យមានការនាំចេញអាវុធ ប្រល័យលោក ខណៈដែល ៣៥ ភាគរយ បានសម្តែងការគាំទ្រ។
នៅថ្ងៃទី២១ ខែមេសា រដ្ឋាភិបាលជប៉ុន ដឹកនាំដោយលោកស្រីនាយករដ្ឋមន្ត្រី Sanae Takaichi បានកែសម្រួលជាផ្លូវការនូវ “គោលការណ៍៣ ស្តីពីការផ្ទេរឧបករណ៍ការពារជាតិ និងបច្ចេកវិទ្យា” និងគោលការណ៍ ណែនាំអនុវត្តរបស់ពួកគេ ដោយលុបចោលការរឹតបន្តឹង ដែលបានកំណត់ការនាំចេញ ឧបករណ៍ការពារជាតិរបស់ជប៉ុន ទៅជាប្រភេទមិនមែនប្រយុទ្ធចំនួន៥ និងអនុញ្ញាតឱ្យមានការលក់អាវុធនៅក្រៅប្រទេស រួមទាំងអាវុធ ដែលមានសមត្ថភាពប្រល័យលោក។ ការកែសម្រួលនេះបានទាក់ទាញ ការព្រួយបារម្ភ និងការតវ៉ាយ៉ាងខ្លាំងនៅក្នុងប្រទេសជប៉ុន៕
