អាមេរិក៖យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា អង្គការអវកាស អាមេរិកណាសា
“NASA” បានផ្លាស់ប្តូរអវកាស យានិក របស់ខ្លួនជាបណ្តោះអាសន្ន នៅលើស្ថានីយ៍អវកាសអន្តរជាតិ (ISS) ចូលទៅក្នុងយានអវកាស ជម្លៀសកាលពីថ្ងៃសុក្រ បន្ទាប់ពីមានការលេចធ្លាយខ្យល់ ត្រូវបានរកឃើញក្នុងម៉ូឌុលមួយ ខណៈពេលដែលអវកាសយានិករុស្ស៊ីកំពុងធ្វើការជួសជុលវា។
យោងតាមអ្នកនាំពាក្យរបស់ NASA លោកស្រី Bethany Stevens បាននិយាយថា ដោយសារមានការប្រុងប្រយ័ត្នខ្ពស់ សមាជិកនៃបេសកកម្ម Crew-12 របស់ទីភ្នាក់ងារត្រូវបាន ណែនាំឲ្យស្លៀកពាក់ឈុតអវកាសរបស់ពួកគេ និងជ្រកកោនក្នុងយានអវកាស SpaceX Dragon យានប្រើសម្រាប់បេសកកម្ម ដឹកជញ្ជូនទៅ និងមកពី ISS ខណៈពេលដែលការជួសជុលត្រូវបានអនុវត្ត។
សាជីវកម្មអវកាសរុស្ស៊ី Roscosmos បាននិយាយថា កន្លែងលេចធ្លាយអាចកើតមានពីរត្រូវបានកំណត់ អត្តសញ្ញាណក្នុងអំឡុងពេលត្រួតពិនិត្យសម្ពាធជាប្រចាំ ក្នុងបន្ទប់ផ្ទេរនៃម៉ូឌុលសេវាកម្ម Zvezda ត្រូវបានគេស្គាល់ថា PrK ជាសមាសធាតុសំខាន់នៃស្ថានីយ៍។ មួយត្រូវបានជួសជុលយ៉ាងឆាប់រហ័សដោយប្រើសារធាតុផ្សាភ្ជាប់ពិសេស ហើយការរៀបចំបានចាប់ផ្តើមជួសជុលកន្លែងទីពីរនៅ ក្នុងផ្នែករាងកោណនៃបន្ទប់។
Reuters ដោយដកស្រង់សម្តីមន្ត្រីជាន់ខ្ពស់ NASA មួយរូបបានរាយការណ៍ថា លោកស្រី Stevens បានបន្តថា NASA និង Roscosmos បានតាមដានជាយូរមកហើយនូវស្នាមប្រេះក្នុងម៉ូឌុល Zvezda ហើយបានធ្វើការរួមគ្នាដើម្បីកំណត់មូលហេតុនៃការបាត់បង់សម្ពាធដដែលៗ។
លោកស្រីបានបន្ថែមថា Roscosmos បានសម្រេចចិត្តធ្វើប្រតិបត្តិការជួសជុលយ៉ាងទូលំទូលាយបន្ទាប់ពីការលេចធ្លាយចុងក្រោយត្រូវបានរកឃើញ។ អត្រាលេចធ្លាយបានកើនឡើងទ្វេដងពីប្រហែលកន្លះគីឡូក្រាមនៃខ្យល់ក្នុងមួយថ្ងៃដល់ជិតមួយគីឡូក្រាមនៅដើមសប្តាហ៍នេះ៕
