ព័រទុយហ្គាល់៖នេះបើយោងតាមអ្នកតំណាង របស់តារាបាល់ទាត់រូបនេះ បាននិយាយថា មហាសេដ្ឋីបាល់ទាត់ និងកីឡាករបាល់ទាត់ឆ្នើម ជនជាតិព័រទុយហ្គាល់ លោក Cristiano Ronaldo និងដៃគូយូរអង្វែងរបស់លោក អ្នកនាងGeorgina Rodriguez បានរៀបការកាលពីថ្ងៃអង្គារ ក្នុងពិធីមួយនៅរមណីយដ្ឋាន Cascais ប្រទេសព័រទុយហ្គាល់ យោងតាមការចេញផ្សាយពីគេហទំព័រ VN Express ។
ពិធីមង្គលការនេះបានបញ្ចប់ទំនាក់ទំនងរយៈពេលមួយទសវត្សរ៍ ហើយបានកើតឡើង បន្ទាប់ពីការរំពឹងទុកយ៉ាងខ្លាំង របស់ប្រព័ន្ធផ្សព្វផ្សាយជាច្រើនថ្ងៃ ក្នុងប្រទេសព័រទុយហ្គាល់លើទីតាំង និងពេលវេលានៃពិធីមង្គលការ ។ លោក Ronaldo អាយុ ៤១ ឆ្នាំ បានចែករម្លែករូបភាពដៃ របស់គូស្នេហ៍ជាមួយនឹងចិញ្ចៀន អាពាហ៍ពិពាហ៍របស់ពួកគេ និងចំណងជើងថា “C (បេះដូង) G” នៅលើគណនី Instagram របស់លោក។
នេះបើយោងតាមក្រុមហ៊ុន Brunswick Group ដែលទទួលបន្ទុកទំនាក់ទំនងសាធារណៈរបស់កីឡាករ បានប្រាប់ AFP ថា កូនៗទាំង ៥ នាក់របស់គូស្នេហ៍នេះបានចូលរួមពិធីឯកជន និងស្និទ្ធស្នាល ។ គូស្នេហ៍នេះបានរៀបការមួយឆ្នាំយ៉ាងពិតប្រាកដ បន្ទាប់ពីអ្នកនាង Rodriguez ជាអ្នកមានឥទ្ធិពលអាយុ ៣២ ឆ្នាំ បានប្រកាសពីការភ្ជាប់ពាក្យរបស់ពួកគេនៅលើបណ្តាញសង្គម Instagram។
លោក Ronaldo បានលេងឲ្យក្រុមជម្រើសជាតិព័រទុយហ្គាល់នៅព្រឹត្តិការណ៍ World Cup នៅរដូវក្តៅនេះ ជាកន្លែងដែលពួកគេបានធ្លាក់ចេញនៅវគ្គ ១៦ ក្រុមចុងក្រោយ បច្ចុប្បន្នកំពុងលេងឲ្យក្លឹប Al Nassr របស់អារ៉ាប៊ីសាអូឌីត។ អតីតខ្សែប្រយុទ្ធរបស់ក្រុម Manchester United, Real Madrid និង Juventus រូបនេះបានឈ្នះពានរង្វាន់ Ballon d’Or សម្រាប់កីឡាករល្អបំផុតរបស់ពិភពលោកចំនួន ៥ ដង។
អ្នកនាង Rodriguez បានបង្កើនកេរ្តិ៍ឈ្មោះរបស់នាងដោយសម្តែងក្នុងកម្មវិធី Netflix មួយដែលមានឈ្មោះថា “I am Georgina” ដែលកត់ត្រាជីវិតគ្រួសាររវាងបាល់ទាត់ ម៉ូដ និងការធ្វើដំណើរ៕
