បរទេស៖ កំពូលតារាចម្រៀងរ៉េប Kanye “Ye” West ត្រូវបានលុបចោលការប្រគំតន្ត្រីលក់សំបុត្រអស់ (Sold-out) របស់ខ្លួននៅប្រទេសរុស្ស៊ី ដែលគ្រោងនឹងធ្វើឡើងនៅចុងសប្តាហ៍ក្រោយ ។ ការសម្រេចចិត្តនេះបានកើតឡើង បន្ទាប់ពីមានការជជែកដេញដោលជាច្រើនសប្តាហ៍ រវាងអ្នករៀបចំព្រឹត្តិការណ៍ និងកីឡដ្ឋាននៅទីក្រុង Saint Petersburg ស្របពេលដែលក្រសួងការបរទេស និងអ្នកនយោបាយរុស្ស៊ី បានចេញមុខរិះគន់ប្រវត្តិនៃការលើកឡើងប្រឆាំង នឹងជនជាតិជ្វីហ្វ (Antisemitism) របស់តារារូបនេះ នេះបើយោងតាមការចេញផ្សាយពីសារព័ត៌មាន The Hollywood Reporter ថ្ងៃទី២ ខែតុលា ឆ្នាំ២០២៦។
ក្រុមហ៊ុនរៀបចំព្រឹត្តិការណ៍ Say Agency ដែលមានមូលដ្ឋាននៅទីក្រុងមូស្គូ បានប្រកាសនៅលើបណ្តាញ Telegram កាលពីថ្ងៃព្រហស្បតិ៍ថា ការប្រគំតន្ត្រីដែលគ្រោងធ្វើឡើងនៅកីឡដ្ឋាន Gazprom Arena ក្នុងទីក្រុង Saint Petersburg នៅថ្ងៃទី១០ និងទី១១ ខែតុលា នឹងមិនដំណើរការនោះទេ។ ក្រុមហ៊ុននេះក៏មិនបានបញ្ជាក់ពីគម្រោងលើកពេលទៅថ្ងៃណាផ្សេងនោះដែរ។
ក្រុមហ៊ុន Say Agency បានបញ្ជាក់ក្នុងសេចក្តីថ្លែងការណ៍ថា “មិត្តភក្តិទាំងអស់គ្នា យើងសូមសម្តែងការសោកស្តាយយ៉ាងជ្រាលជ្រៅក្នុងការជម្រាបជូនថា ការប្រគំតន្ត្រីរបស់ Ye នៅ St. Petersburg តាមកាលវិភាគដែលបានកំណត់ នឹងមិនអាចប្រព្រឹត្តទៅបានឡើយ។ នៅក្នុងពេលឆាប់ៗខាងមុខនេះ យើងនឹងចេញសេចក្តីថ្លែងការណ៍ផ្លូវការទាក់ទងនឹងស្ថានភាពនៃគម្រោង និងផែនការនាពេលអនាគត។ Say Agency សូមអរគុណយ៉ាងជ្រាលជ្រៅចំពោះអ្នកទាំងអស់គ្នា ដែលបាននៅក្បែរយើងកាលពីមួយខែ និងកន្លះកន្លងមកនេះ។”
កាលពីដំបូងឡើយ ខាងកីឡដ្ឋាន Gazprom Arena បានសម្តែងការស្វាគមន៍យ៉ាងកក់ក្តៅ ដោយបានហៅលោក West ថាជា “សិល្បករតន្ត្រីដែលមានឥទ្ធិពលបំផុតក្នុងសម័យកាលរបស់យើង”។ ប៉ុន្តែ ជំហរនេះបានប្រែប្រួលភ្លាមៗនៅក្នុងខែសីហា បន្ទាប់ពីសំបុត្រទាំងពីររាត្រីត្រូវបានលក់ដាច់អស់ ដោយខាងកីឡដ្ឋានបានប្រកាសថាមិនទាន់មានការចុះកិច្ចសន្យាណាមួយត្រូវបានចុះហត្ថលេខានៅឡើយទេ ហើយថ្នាក់គ្រប់គ្រងកីឡដ្ឋានក៏មិនបានទទួលខុសត្រូវលើការកក់នោះដែរ។
លើសពីនេះ ព្រឹត្តិការណ៍ប្រគំតន្ត្រីនេះបានក្លាយជាប្រធានបទើ
ក្រសួងការបរទេសរុស្ស៊ី អ្នកកនាំពាក្យលោកស្រី Maria Zakharova បានចាត់ទុកជាសាធារណៈថា ការរៀបចំការប្រគំតន្ត្រីនេះគឺ “មិនអាចទទួលយកបានឡើយ” ដោយលើកឡើងពីសម្តីពីអតីតកាលរបស់ West ដែលបានសរសើរលើកតម្កើង Adolf Hitler។
ការលុបចោលការប្រគំតន្ត្រីនៅ St. Petersburg គឺជាការខកខានចុងក្រោយបង្អស់នៃដំណើរបំពេញទស្សនកិច្ចតន្ត្រីឆ្នាំ២០២៦ របស់ West។ អាល់ប៊ុមវិលត្រឡប់របស់លោកដែលមានចំណងជើងថា Bully ត្រូវបានចេញផ្សាយកាលពីខែមីនា បន្ទាប់ពីជីវិតផ្ទាល់ខ្លួន និងអាជីពរបស់លោកបានធ្លាក់ចុះក្នុងភាពវឹកវរជាច្រើនឆ្នាំ។
កាលពីឆ្នាំ២០២១ លោក និងអតីតភរិយា Kim Kardashian បានដាក់ពាក្យលែងលះ។ បន្ទាប់មក នៅចុងឆ្នាំ២០២២ ការបង្ហោះសារប្រឆាំងជនជាតិជ្វីហ្វជាបន្តបន្ទាប់នៅលើ Twitter (X) បានធ្វើឱ្យ West និងក្រុមហ៊ុន Yeezy បាត់បង់ដៃគូពាណិជ្ជកម្ម និងកិច្ចសន្យាឧបត្ថម្ភខ្នាតធំៗជាច្រើន រួមមាន Vogue, Universal Music Group, CAA, Balenciaga, Gap និង Adidas។
ទោះបីជាក្រោយមក លោក West បានចេញមុខសុំទោសជាបន្តបន្ទាប់ (រួមទាំងការចុះផ្សាយពាណិជ្ជកម្មសុំទោសនៅលើកាសែត The Wall Street Journal ក្នុងឆ្នាំ២០២៤) និងប្រកាសពីក្តីស្រឡាញ់ចំពោះជនជាតិជ្វីហ្វក៏ដោយ ក៏ប្រតិកម្មរបស់មហាជននៅតែមានភាពត្រជាក់ស្រេប។
ទោះជាយ៉ាងណា ដំណើរបំពេញទស្សនកិច្ចប្រគំតន្ត្រីរបស់លោកនៅសហរដ្ឋអាមេរិកនៅតែបន្តលក់សំបុត្រដាច់អស់ ខណៈដែលកាលវិភាគប្រគំតន្ត្រីជាច្រើនត្រូវបានប្រកាសទូទាំងទ្វីបអឺរ៉ុប និងតំបន់ផ្សេងទៀត៕
ប្រែសម្រួល៖ គីរី
