ញូវយ៉ក ៖ អាជ្ញាធរអាមេរិកបានឱ្យដឹងថា តារាសម្តែងហូលីវូដ អ្នកស្រី Selma Blair ត្រូវបានប៉ូលិសចាប់ឃាត់ខ្លួន បន្ទាប់ពីចុះពីជើងហោះហើរពីទីក្រុង Los Angeles ទៅកាន់ទីក្រុងញូវយ៉ក ជុំវិញការចោទប្រកាន់ថាបានប្រើប្រាស់អំពើហិង្សា និងបង្ករបួសស្នាមដល់បុគ្គលិកបម្រើការលើយន្តហោះចំនួនពីរនាក់ នេះបើយោងតាមចេះផ្សាយពីសារព័ត៌មាន CNA ថ្ងៃទី១៣ ខែតុលា ឆ្នាំ២០២៦។
សេចក្តីថ្លែងការណ៍ពីអាជ្ញាធរ កំពង់ផែញូវយ៉ក និងញូវជឺស៊ី (Port Authority) បានបញ្ជាក់ថា តារាស្រីវ័យ ៥៤ឆ្នាំរូបនេះ ត្រូវបានឃាត់ខ្លួន កាលពីយប់ជ្រៅថ្ងៃអាទិត្យ ខណៈពេលដែលយន្តហោះរបស់ក្រុមហ៊ុន Delta Air Lines កំពុងចតនៅច្រកទ្វារនៃអាកាសយានដ្ឋានអន្តរជាតិ John F. Kennedy (JFK) ក្នុងទីក្រុងញូវយ៉ក។
ការបញ្ជូនទៅមន្ទីរពេទ្យ និងការស៊ើបអង្កេត៖ ក្រោយពេលកើតហេតុ អ្នកស្រី Blair និងបុគ្គលិកបម្រើការលើយន្តហោះម្នាក់ ត្រូវបានបញ្ជូនទៅកាន់មន្ទីរពេទ្យដើម្បីធ្វើការពិនិត្យសុខភាព។ បច្ចុប្បន្ន ការិយាល័យស៊ើបអង្កេតសហព័ន្ធ (FBI) កំពុងធ្វើការស៊ើបអង្កេតលើករណីនេះ។ មកទល់ពេលនេះ ទាំងក្រុមហ៊ុនអាកាសចរណ៍ Delta Air Lines អង្គភាព FBI និងការិយាល័យរដ្ឋអាជ្ញា មិនទាន់មានការឆ្លើយតបផ្លូវការណាមួយនៅឡើយទេ។
ទោះជាយ៉ាងណាក៏ដោយ តំណាងរបស់អ្នកស្រី Blair បានប្រាប់បណ្តាញសារព័ត៌មានជាច្រើនថា អ្នកស្រីមាន “បញ្ហាសុខភាពបន្ទាន់ (Medical emergency)” ដែលជាមូលហេតុបណ្តាលឱ្យមានអាកប្បកិរិយាដូចការចោទប្រកាន់ខាងលើ ខណៈអ្នកតំណាងផ្ទាល់ខ្លួនរបស់អ្នកស្រីមិនទាន់ឆ្លើយតបនឹងសំណើសុំការបំភ្លឺនៅឡើយទេ។
អ្នកស្រី Selma Blair គឺជាតារាសម្តែងដ៏មានប្រជាប្រិយភាពមួយរូប ដែលធ្លាប់សម្តែងជាតួអង្គសំខាន់ៗក្នុងខ្សែភាពយន្តល្បីៗជាច្រើនរួមមាន Cruel Intentions (១៩៩៩), Legally Blonde (២០០១) និង Hellboy (២០០៤)។
ក្នុងរយៈពេលប៉ុន្មានឆ្នាំចុងក្រោយនេះ អ្នកស្រីគឺជាសកម្មជនដ៏លេចធ្លោម្នាក់ក្នុងការតស៊ូមតិដើម្បីសិទ្ធិជនពិការ។ អ្នកស្រីត្រូវបានគ្រូពេទ្យធ្វើរោគវិនិច្ឆ័យឃើញថាមានជំងឺប្រព័ន្ធសរសៃប្រសាទកម្រិតធ្ងន់ (Multiple Sclerosis) ក្នុងឆ្នាំ ២០១៨។ កាលពីឆ្នាំ ២០២៣ កន្លងទៅ អ្នកស្រីថែមទាំងត្រូវបានអញ្ជើញឱ្យចូលរួមជាមួយលោកប្រធានាធិបតី Joe Biden នៅឯសេតវិមាន ដើម្បីប្រារព្ធខួបនៃច្បាប់ស្តីពីជនជាតិអាមេរិកដែលមានពិការភាព (Americans with Disabilities Act) ផងដែរ។
ប្រែសម្រួល៖ គីរី
