ភ្នំពេញ៖ក្រុមកីឡាករ-កីឡាការិនីគុនដាវកម្ពុជា ដណ្តើមបានមេដាយ៥គ្រឿង ពីព្រឹត្តិការណ៍ការប្រកួតជ្រើសរើសជើងឯកកីឡាគុនដាវ សកលវិទ្យាល័យអាស៊ីអាគ្នេយ៍ លើកទី៣ ឆ្នាំ២០២០នៅទីក្រុងកូឡាឡាំពួក ប្រទេសម៉ាឡេស៊ីដែល បានប្រព្រឹត្តចាប់ពីថ្ងៃទី៥ដល់ថ្ងៃទី៨ ខែមីនា ឆ្នាំ២០២០។
ក្រុមអត្តពលិកគុនដាវរបស់យើងដណ្តើមបានមេដាយ៥ គ្រឿងរួមមាន៖មាស១គ្រឿង ប្រាក់១គ្រឿង និងមេដាយសំរិទ្ធិចំនួន០៣គ្រឿង៖ កីឡាការិនី ឆាយ លីនលី ទទួលបាន មេដាយមាស១គ្រឿងវិញ្ញាសានារីឯកត្តជនដាវតូច កីឡាការិនី យី លីហ្សា ទទួលបានមេដាយប្រាក់១គ្រឿងវិញ្ញាសានារី ឯកត្តជនដាវតូច កីឡាការិនី សន និច ទទួលបាន មេដាយសំរិទ្ធ១គ្រឿងវិញ្ញាសានារីឯកត្តជនដាវតូច កីឡាការិនី សន និច ទទួលបាន មេដាយសំរិទ្ធ១គ្រឿ វិញ្ញាសានារីឯកត្តជនដាវធំ និងកីឡាករ ថុង តាំងជីន ទទួលបាន មេដាយសំរិទ្ធ១គ្រឿង សម្រាប់វិញ្ញាសាបុរសឯកត្តជនដាវតូច។
ចំពោះលទ្ធផលនេះលោក សុខ អាង អគ្គលេខាធិការសហព័ន្ធកីឡាគុនដាវ កម្ពុជាទទួលស្គាល់ថា វាមានការកើនឡើងនៃចំនួនមេដាយ ជាពិសេសមេដាយមាស មួយគ្រឿងក្នុងវិញ្ញាសាឯកត្តជន បើយើងប្រៀបធៀប ទៅនឹងឆ្នាំមុនៗសម្រាប់ ការប្រកួតកម្រិតសាកលវិទ្យាល័យអាស៊ីអាគ្នេយ៍នេះ ប៉ុន្ដែយើងក៏ទទួលស្គាល់ដែលថាចំនួនកីឡាករ កីឡាការិនីចូលរួមលើកនេះមានការថយចុះ បើទោះជាមានប្រទេស៦ចូលរួមក៏ដោយ។
ការថយចុះនេះ ក៏ព្រោះតែជំងឺ COVID-19 ដែលកំពុងរាតត្បាតនៅទូទាំងពិភពលោក។ សម្រាប់ក្រុមអត្តពលិកកម្ពុជា យើងក៏ធ្វើការណែនាំ និងរៀបចំជាអាកុល ម៉ាស និងថ្នាំសង្កូវ សម្រាប់ពួកគាត់ក្នុងការពារខ្លួន ហើយមានការណែនាំពីប្រធានសហព័ន្ធ លោកបានស្នើសុំលោកជំទាវវេជ្ជបណ្ឌិត សុខា សុធានី ធ្វើការតាមដាន និងយកចិត្តទុកដាក់ជាប្រចាំ។ ហើយមកដល់ពេលបច្ចុប្បន្ន ស្ថានភាពរបស់ប្រតិភូកម្ពុជាទាំងអស់គឺមានសុខភាព និងស្ថានភាពល្អប្រសើរ។
សហព័ន្ធកីឡាគុនដាវកម្ពុជា ទទួលបានគោលការណ៍ របស់ក្រសួងអប់រំ យុវជន និងកីឡា អនុញ្ញាតឲ្យអត្តពលិកគុនដាវទៅចូលរួម ប្រកួតជ្រើសរើសជើងឯកកីឡាគុនដាវសកលវិទ្យាល័យអាស៊ីអាគ្នេយ៍លើកទី៣ ឆ្នាំ២០២០ នៅទីក្រុងកូឡាឡាំពួក ប្រទេសម៉ាឡេស៊ី ចាប់ពីថ្ងៃទី០៥ដល់ថ្ងៃទី០៨ ខែមីនា ឆ្នាំ២០២០។ យោងតាមផែនការ សហព័ន្ធគុនដាវបានបញ្ជូនអត្តពលិកចំនួន៩នាក់ គ្រូបង្វឹក៣នាក់ ទៅចូលរួម៕ ដោយ៖លី ភីលីព
