បរទេស៖ យោងតាមសេចក្តីរាយការណ៍មួយ ពីទីភ្នាក់ងារសារព័ត៌មាន របស់ប្រទេសកូរ៉េខាងត្បូង នាពេលថ្មីៗនេះ បានឲ្យដឹងថា សហរដ្ឋអាមេរិកនិងកូរ៉េខាងត្បូង នៅមិនទាន់សម្រេច បានដំណោះស្រាយ ស្តីពីការចែករំលែកបន្ទុក ការពារជាតិនៅឡើយ បើទោះជាមានសេចក្តីរាយការណ៍ បញ្ជាក់ផ្សេងក៏ដោយ។
ទីភ្នាក់ងារសារព័ត៌មាន News 1 បានរាយការណ៍ថា ប្រភពមួយនៅវិមានខៀវ ប្រធានាធិបតីកូរ៉េខាងត្បូង បានធ្វើការបញ្ជាក់ថា កិច្ចចរចាគ្នានានា លើកិច្ចព្រមព្រៀងចំណាត់ការពិសេស កំពុងតែប្រព្រឹត្តទៅ ហើយភាគីទាំងពីរ នៅមិនទាន់ព្រមព្រៀងគ្នា លើចំនួនចុងក្រោយនៅឡើយទេ។
យោងតាមកាសែត News 1 ប្រភពរដ្ឋាភិបាលបាននិយាយថា ភាគីទាំងពីរបានព្រមព្រៀងគ្នា ចំពោះការបង្កើនពី១៣ទៅ១៤ភាគរយ នៅក្នុងចំណែកបន្ទុក ការពារជាតិកូរ៉េខាងត្បូង កាលពីចុងខែមីនា ប៉ុន្តែកាលពីថ្ងៃទី២០ ខែមេសា ក្នុងសន្និសីទកាសែតមួយ នៅសេតវិមាន លោក ត្រាំ បានធ្វើការបដិសេធ ជាសាធារណៈថា គ្មានកិច្ចព្រមព្រៀងណាមួយ សម្រេចបាននៅឡើយនោះទេ៕
ប្រែសម្រួល៖ប៉ាង កុង
