បរទេស៖ មន្ត្រីទទួលបន្ទុក កិច្ចការសាធារណៈ នៅមូលដ្ឋានទ័ព តាមសេចក្តីរាយការណ៍ បានធ្វើការបញ្ជាក់នៅថ្ងៃពុធ សប្ដាហ៍នេះថា យន្តហោះចម្បាំងបំបាំងកាយដ៏ទំនើប របស់សហរដ្ឋអាមេរិក F-35A Lightning II បានជួបគ្រោះថ្នាក់ ក្នុងពេលចុះចត នៅមូលដ្ឋានទ័ពអាកាស Eglin រដ្ឋផ្លរីដា តែពីឡុតបានលោតចេញបាន ដោយសុវត្ថិភាព។
នៅក្នុងសេចក្តី ចេញប្រកាសព័ត៌មានមួយ មន្ត្រីអាមេរិករូបនោះ បាននិយាយប្រាប់ដូច្នេះថា គ្រោះថ្នាក់នោះ បានកើតមានឡើង កាលពីល្ងាចថ្ងៃអង្គារ នៅក្នុងអំឡុងពេល ធ្វើសមយុទ្ធហ្វឹកហាត់ពេលយប់ តាមប្រក្រតី ដោយកងយន្តហោះចម្បាំងលេខ៤៣ របស់ទ័ពអាកាសអាមេរិក នៅមូលដ្ឋានទ័ពអាកាស Eglin។
គួរបញ្ជាក់ថា យន្តហោះចម្បាំង F-35 ត្រូវបានគេចាត់ទុកថា ជាយន្តហោះចម្បាំង ប្រភេទទំនើបបំផុត នៅក្នុងពិភពលោក ហើយក្នុងពេលបច្ចុប្បន្ននេះ វាមានតម្លៃដល់ទៅប្រហែល ៧៩លានដុល្លារ ក្នុងមួយគ្រឿង ហើយតម្លៃនេះ គឺធ្លាក់ចុះពីតម្លៃដើមរបស់វា ដែលមានចំនួនប្រមាណ ១៥០លានដុល្លារ ក្នុងមួយគ្រឿង៕ ប្រែសម្រួល៖ប៉ាង កុង
