សេអ៊ូល៖ រដ្ឋមន្រ្តីការពារជាតិ Jeong Kyeong-doo បានឲ្យដឹងថា ប្រទេសកូរ៉េខាងត្បូង នឹងឆ្លើយតបយ៉ាងខ្លាំង ដោយមិនវង្វេងស្មារតីនោះទេ ប្រសិនបើប្រទេសកូរ៉េខាងជើង ធ្វើសកម្មភាពបង្កហេតុខាងយោធា។
ភាពតានតឹងកំពុងកើនឡើងខ្ពស់ នៅឧបទ្វីបកូរ៉េ ដោយសារប្រទេសកូរ៉េខាងជើង បានគំរាមរារាំងរាល់គម្រោងរួមគ្នា និងចាប់ផ្តើមសកម្មភាពយោធា ប្រឆាំងនឹងអ្វីដែលហៅថា សត្រូវដោយសំអាងលើការបរាជ័យ របស់កូរ៉េខាងត្បូង ក្នុងការបញ្ឈប់អ្នករត់ចោលជួរ ពីការបញ្ជូនខិត្តប័ណ្ណ រិះគន់មេដឹកនាំរបស់ខ្លួន ឆ្លងកាត់ព្រំដែន។
ថ្មីៗនេះកូរ៉េខាងជើង បានបំផ្លាញការិយាល័យ ទំនាក់ទំនងអន្តរកូរ៉េ នៅទីប្រជុំជន Kaesong ដែលជានិមិត្តរូបនៃការផ្សះផ្សារ និងសមិទ្ធិផល នៃសេចក្តីប្រកាស Panmunjom ដោយប្រធានាធិបតីលោក មូន ជេអ៊ីន និងមេដឹកនាំកូរ៉េខាងជើង លោក គីម ជុងអ៊ុននៅឆ្នាំ ២០១៨៕ ដោយ៖ ឈូក បូរ៉ា
