បរទេស៖ កាលពីថ្ងៃអង្គារក្លឹបបាល់ទាត់ អេស្ប៉ាញ Barcelona បានបញ្ជាក់ថា កំពូលតារាឆ្នើម របស់ខ្លួនគឺ Lionel Messi បានប្រកាសចង់ ចាកចេញពីក្លឹបកាតាឡាន ដោយបញ្ចប់អាជីពរយៈពេល ២០ ឆ្នាំជាមួយពហុកីឡដ្ឋាន Camp Nou ឆាប់ៗនៅរដូវក្តៅនេះ ។ ពាក្យចចាមអារាម បានលើកឡើងថា ខ្សែប្រយុទ្ធអាហ្សង់ទីនរូបនេះ អាចផ្លាស់ទៅកាន់ក្លឹប Manchester City របស់អង់គ្លេសដែលគ្រប់គ្រង ដោយអតីតគ្រូបង្វឹករបស់គាត់គឺលោក Pep Guardiola ។
យោងតាមសារព័ត៌មាន Sputnik ចេញផ្សាយនៅយប់ថ្ងៃទី៣០ ខែសីហា ឆ្នាំ២០២០ បានឱ្យដឹងដោយផ្អែកតាមការចេញផ្សាយ របស់កាសែត Sport.es នៅថ្ងៃអាទិត្យនេះថា ក្លឹបបាល់ទាត់ក្របខណ្ឌ English Premier League គឺ Manchester City បានត្រៀមខ្លួនរួចជាស្រេច ក្នុងការផ្តល់ឱ្យកំពូលតារាឆ្នើម របស់ក្រុម FC Barcelona គឺ Lionel Messi ដែលមានកិច្ចសន្យា ៥ ឆ្នាំ ក្នុងតម្លៃ ៥០០ លានអឺរ៉ូ។
កាលពីថ្ងៃអង្គារ ក្លឹប Barcelona បានបញ្ជាក់ថា កីឡាករ ដែលរកគ្រាប់បាល់ បានច្រើនជាងគេ គឺកីឡាករ Lionel Messi បានជូនដំណឹងដល់ ក្រុមអំពីគោលបំណង របស់គាត់ក្នុងការចាកចេញ ពីក្របខណ្ឌ La Liga ។ Messi មានកុងត្រា ជាមួយក្លឹបរហូតដល់ឆ្នាំ ២០២១ ដោយមានលក្ខខណ្ឌ ក្នុងការចាកចេញពី Barcelona នៅចុងបញ្ចប់នៃរដូវកាល ២០១៩-២០ ដែលផុតកំណត់នៅថ្ងៃទី ៣១ ខែកក្កដា ៕
ប្រែសម្រួលៈ ណៃ តុលា
