ក្រុមហ៊ុន Apple បានប្រកាសចេញ iPhone ដែលមានតម្លៃដល់ ១ ពាន់ដុល្លារដំបូងកាលពីឆ្នាំ ២០១៧ គឺជាម៉ូដែល iPhone X ប៉ុន្តែនាយកប្រតិបត្តិក្រុមហ៊ុនលោក Tim Cook ធ្លាប់បានលើកឡើងថាមិនមែនគ្រប់ផលិតផល Apple ទាំងអស់ផលិតសម្រាប់តែអ្នកមាននោះទេ។
”ប្រសិនបើអ្នកមើលលើផលិតផលរបស់យើងទាំងអស់ អ្នកនឹងឃើញថាអ្នកអាចទិញ iPad មួយនៅថ្ងៃនេះ ក្នុងតម្លៃក្រោម ៣០០ ដុល្លារ។ អ្នកក៏អាចទិញ iPhone មួយបាន អាស្រ័យលើម៉ូដែលមួយណាដែលអ្នកចង់បាន ក្នុងបរិមាណទឹកលុយប្រហែលគ្នានេះ។ នេះជាការលើកឡើងរបស់លោក Tim Cook ក្នុងកិច្ចសម្ភាសន៍ជាមួយទស្សនាវដ្ដី Fortune។
“ដូច្នេះផលិតផលទាំងឡាយរបស់ Apple មិនមែនសម្រាប់តែអ្នកមាននោះទេ។ ប្រសិនបើយើងផលិតសម្រាប់តែអ្នកមាននោះយើងមិនអាចលក់ចេញផលិតផលបានជាង ១ ពាន់លានគ្រឿង ដូចកន្លងមកនេះឡើយ”។ លោក Tim Cook បន្ថែម។
នាយកប្រតិបត្តិរូបនេះក៏បានជំទាស់នឹងមតិរបស់អ្នកសម្ភាសន៍ដែលថា យុទ្ធសាស្ត្រជំនួញរបស់ Apple គឺដើម្បីផលិត “ផលិតផលមានតម្លៃខ្ពស់, ទទួលបានផលចំណេញខ្ពស់ និងមានសមត្ថភាពខ្លាំង”។ លោកបានលើកឡើងដូចនេះ ៖ “មិនមែនចង់បានផលចំណេញខ្ពស់ទេ។ មានក្រុមហ៊ុនច្រើនទៀតដែលបានផលចំណេញពីការលក់ផលិតផលខ្ពស់ជាងនេះ។ យើងកំណត់តម្លៃលក់ ទៅលើគុណតម្លៃផលិតផលយើង ហើយយើងព្យាយាមផលិតផលិតផលដែលល្អបំផុត។ នេះមានន័យថាយើងមិនផលិតផលិតផលដែលកេងយកប្រាក់ចំណេញខ្ពស់នោះទេ។ យើងក៏មិនបង្អាប់ក្រុមហ៊ុនផ្សេងដែលប្រើយុទ្ធសាស្ត្រជំនួញបែបនេះដែរ ប៉ុន្តែវាមិនមែនជាយុទ្ធសាស្ត្រដែលយើងអនុវត្តន៍ទេ”៕ប្រភព៖sabay
