អតីតកីឡាករ ខ្សែការពារហង្សក្រហម Liverpool លោក Jamie Carragher នៅសប្តាហ៍នេះ បានធ្វើការព្រមានចំៗ ទៅលើក្លឹបបិសាចក្រហម Man United ថាប្រសិនបើគេមិនសម្រេច ចុះកុងត្រាទិញ Jadon Sancho ឲ្យបាននៅរដូវក្តៅទេនោះ ខ្លួននឹងជួបគូប្រជែងធំមួយមិនខាន នៅឆ្នាំក្រោយ។
ហង្សក្រហម Liverpool ត្រូវបានគេជឿជាក់ថា ពិតជាមានចំណាប់អារម្មណ៍ខ្លាំងមែនទែន ចំពោះខ្សែប្រយុទ្ធអង់គ្លេស ដែលកំពុងលេងនៅក្លឹប Borussia Dortmund វ័យទើបតែ២០ឆ្នាំរូបនេះ ប៉ុន្តែបញ្ហាក្នុងការចាកចេញពីក្លឹបនៅពេលនេះ គឺថាកីឡាករនឹងមានតម្លៃ មិនក្រោម១០៨លានផោនឡើយ។
បិសាចក្រហម Man United កន្លងមក ពិតជាបានព្យាយាម ក្នុងការចរចាសុំទិញ Sancho ជាច្រើនលើកពិតមែន ដោយមានទាំងការសុំដោះដូរកីឡាករមួយចំនួនផង ព្រោះថា តម្លៃខ្លួនដ៏ច្រើនបែបនេះ គឺមិនមានជាអ្វីដែលក្លឹប អាចធ្វើបានដោយផ្ទាល់នោះឡើយ៕
ប្រែសម្រួល៖ស៊ុនលី
