ចិន៖ទិន្នន័យពីបណ្ឌិត្យសភាបច្ចេកវិទ្យាព័ត៌មាន និងគមនាគមន៍ចិនដែលជាអង្គភាពស្រាវជ្រាវរបស់រដ្ឋាភិបាលបានបង្ហាញថា ការចែកចាយទូរស័ព្ទចល័តរបស់ចិន មានចំនួន ២៣,៣៣ លានគ្រឿងក្នុងខែកញ្ញា ធ្លាក់ចុះ៣៥,៦ ភាគរយក្នុងមួយឆ្នាំយោងតាមការ ចេញផ្សាយពី គេហទំព័រឆៃណាឌៀលី។
ការដឹកជញ្ជូនទូរស័ព្ទចល័ត 5G នៅប្រទេសចិនមានចំនួន ១០៨ លានគ្រឿងក្នុងរយៈពេល ៩ ខែដំបូងនៃឆ្នាំនេះស្មើនឹង ៤៧,៧ ភាគរយនៃការនាំចេញស្មាតហ្វូនសរុបរបស់ប្រទេស។ លើសពីនេះទៀតម៉ូដែលសរុបចំនួន ៣៥៩ ត្រូវបានណែនាំនៅលើទីផ្សារចាប់ពីខែមករាដល់ខែកញ្ញាក្នុងនោះ ១៦៧ ជាម៉ូដែល 5G ។
លោកNicole Peng អនុប្រធានផ្នែកភាពចល័តនៅក្រុមហ៊ុនស្រាវជ្រាវទីផ្សារ Canalys បាននិយាយថា ទូរស័ព្ទ iPhone 12 នឹងបង្កឲ្យមានរលកថ្មីនៃការជំនួសទូរស័ព្ទសម្រាប់ក្រុមហ៊ុន Apple នៅប្រទេសចិនមុនដំណាច់ឆ្នាំនេះនិងនៅត្រីមាសទី ១ ឆ្នាំក្រោយ។ ក្រុមហ៊ុន Canalys រំពឹងថា ម្ចាស់ទូរស័ព្ទចិនចំនួន ៥០ ភាគរយនឹងប្រើប្រាស់ឧបករណ៍ 5G នៅចុងឆ្នាំនេះ ដោយសារក្រុមហ៊ុនទូរគមនាគមន៍ និងម៉ាកទូរស័ព្ទបានប្រឹងប្រែងយ៉ាងខ្លាំងក្នុងការជំរុញការអនុម័តនេះ។
លោក Jin Shengtao អ្នកវិភាគនៅក្រុមហ៊ុន Canalys បានមានប្រសាសន៍ថា គេរំពឹងថានៅឆ្នាំ២០២១ស្មាតហ្វូន 5G ជិត ៦០ ភាគរយនៅក្នុងប្រទេសចិននឹងមានតម្លៃថោកជាង៤០០ ដុល្លារ ខណៈការជ្រៀតចូល 5G នៅក្នុងប្រទេសចិននឹងកើនឡើងដល់ ៨៣ ភាគរយក្នុងរយៈពេល ១២ ខែខាងមុខ ។ ការចេញលក់ស្មាតហ្វូនទូទាំងពិភពលោកបានធ្លាក់ចុះ ១៦ ភាគរយក្នុងមួយឆ្នាំនៅត្រីមាសទី ២ នៃឆ្នាំនេះ។
យោងតាម IDCថា Huawei បានក្លាយជាស្មាតហ្វូនធំជាងគេបំផុតនៅលើពិភពលោកក្នុងត្រីមាសទី ២ នៃឆ្នាំនេះដែលជាព្រឹត្តិការណ៍ដ៏សំខាន់មួយសម្រាប់ក្រុមហ៊ុនផលិតស្មាតហ្វូនចិន។ អ្នកលក់ជនជាតិចិនបាននាំចេញឧបករណ៍ចំនួន ៥៥,៨ លានគ្រឿងនៅទូទាំងពិភពលោក ដោយមានចំណែកទីផ្សារ ២០ ភាគរយនៅត្រីមាសទី ២ ខណៈក្រុមហ៊ុន Apple បាននាំចេញទូរស័ព្ទ iPhone ចំនួន ៣៧,៦ លានគ្រឿងនៅចន្លោះខែមេសា និងមិថុនាធ្វើឲ្យក្រុមហ៊ុនឈរនៅចំណាត់ថ្នាក់ទី ៣ ជាមួយចំណែកទីផ្សារ ១៣,៥ ភាគរយ៕ ដោយ៖លី ភីលីព
