ក្លឹប Everton បានប្រកាសថាកំពុងធ្វើការស៊ើបអង្កេតករណីជេរប្រមាថមានលក្ខណៈរើសអើងពូជសាសន៍លើខ្សែប្រយុទ្ធ Son Heung-min។
ក្នុងប្រកួតរវាង Tottenham Hotspur និង Everton យប់មិញដែលបញ្ចប់ដោយលទ្ធផលស្មើ ១ ទល់នឹង ១ កីឡាករកូរ៉េខាងត្បូងបានទទួលកាតក្រហម ក្រោយបានឈូសខ្សែបម្រើ Andre Gomes ដែលរួមចំណែកបង្កឲ្យកីឡាករអេស្ប៉ាញបាក់កជើងស្ដាំ។
Son ត្រូវបានឃើញថាបានសម្រក់ទឹកភ្នែកបង្ហាញភាពសោកស្ដាយចំពោះហេតុការណ៍នេះ មុនចាកចេញពីទីលានប្រកួត។ ទោះជាយ៉ាងណា មានការរាយការណ៍មួយចំនួនបានលើកឡើងថា ក្នុងអំឡុងពេលនោះ មានអ្នកគាំទ្រ Everton ម្នាក់បានធ្វើការជេរប្រមាថរើសអើងពូជសាសន៍ទៅលើកីឡាករកូរ៉េខាងត្បូង។
ឆ្លើយតបនឹងរបាយការណ៍ ទាំងនេះ ក្លឹប Everton បានចេញសេចក្ដីថ្លែងការណ៍មួយដោយបញ្ជាក់ថា ក្លឹបកំពុងធ្វើការ ស៊ើបអង្កេត និងថ្កោលទោសករណី ប្រមាថរើសអើងពូជសាសន៍ខាងលើ៕
ប្រភព៖ news.sabay.com.kh
