ភ្នំពេញ៖អ្នកប្រដាល់ជើងខ្លាំង រឿង សោភ័ណ្ឌ ក្លិបម្កុដរាជសីហ៍ជួបកីឡាករជនជាតិថៃ Phich Many ប្រកួតគ្នាក្នុងប្រភេទទម្ងន់ ៦៥គីឡូក្រាមនាព្រឹកថ្ងៃអាទិត្យ ទី១០ ខែវិច្ឆិកា ឆ្នាំ២០១៩នេះ នៅសង្វៀន Boostrong Fighter On Fireរបស់SEATV។
លោក ញាណ សុធី អ្នកចាត់ចែងកម្មវិធីប្រដាល់ប្រចាំSEATV បានឲ្យដឹងថា រឿង សោភ័ណ្ឌ ត្រូវជួបជាមួយកីឡាករជនជាតិថៃ Phich Many ក្នុងប្រភេទទម្ងន់៦៩គីឡូក្រាម ចំពោះអ្នកប្រដាល់ ថៃម្នាក់នេះមិនទាន់មាននណាដឹងពីស្នៀតប្រកួតរបស់គេខ្លាំងប៉ុណ្ណានោះទេ ចំណែក រឿង សោភ័ណ្ឌ ជាអ្នកប្រដាល់ដែលឡើងប្រកួតកម្រចាញ់គូរប្រកួតណាស់។
លោកបានបន្តថា ព្រោះរូបគេប្រកួតមិនចេះលាក់កម្លាំង និងមានស្នៀតពិសេសដើម្បីផ្តួលដៃគូឲ្យសន្លប់ថែមទៀត ហើយអ្នកប្រដាល់រូបនេះ មានបទពិសោធន៍ និងតិចនិកក្នុងការប្រកួតច្រើន ទាំងការប្រកួតលក្ខណៈមិត្តភាពជាតិ និងអន្តរជាតិទៀតផង។ រឿង សោភ័ណ្ឌ មួយរយៈពេលចុងក្រោយនេះមានការរីកចម្រើនជាងមុនច្រើន ទាំងស្នៀតគុន ទាំងកម្លាំងស៊ុហ្វ ពោល គឺគេហ្វឹកហាត់បានជាប់លាប់ ធ្វើឱ្យកម្លាំងស៊ុហ្វរបស់គេធានាបានក្នុងការប្រកួតប្រាំទឹក ដោយគ្មានបញ្ហាឡើយ។
ចំណែក Phich Many ជាអ្នកប្រដាល់លេងស្នៀតកណ្តាប់ដៃ និងកែង រីឯស្នៀតជើងទាត់ និងជង្គង់របស់គេក៏ល្អហើយខ្លាំងផងដែរ។ អ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា រីឯស្នៀតខ្លាំងទាំងដៃ ទាំងជើង និងកែងបានធ្វើឲ្យ Phich Many ផ្តួលដៃគូជាបន្ត៕ដោយ៖លី ភីលីព
