បរទេស ៖ ប្រទេសកូរ៉េខាងត្បូង បាននិយាយនៅថ្ងៃអង្គារនេះថា ខ្លួនបានប្រញាប់ចេញយន្តហោះចម្បាំង ដើម្បីធ្វើការឆ្លើយតបចំពោះការបំពាន ចូលតំបន់កំណត់ការពារដែនអាកាសកូរ៉េខាងត្បូង ដែលធ្វើឡើងដោយយន្តហោះយោធារុស្ស៊ីនិងចិនចំនួន១៩គ្រឿង ។
យោងតាមការឲ្យដឹង ពីអគ្គសេនាធិការ របស់ប្រទេសកូរ៉េខាងត្បូង យន្តហោះចម្បាំងចិនចំនួន៤គ្រឿង បានហោះហើរចូលក្នុងតំបន់កំណត់ការពារដែនអាកាសកូរ៉េ ហើយបន្ទាប់មកទៀត យន្តហោះរុស្ស៊ីមានចំនួន១៥គ្រឿង ក៏បានហោះចូលក្នុងតំបន់កំណត់ការពារដែន អាកាសនោះផងដែរ។
នៅក្នុងសេចក្តីថ្លែងការណ៍មួយ យោធាកូរ៉េខាងត្បូងបាននិយាយប្រាប់ថា យោធាចិនបានធ្វើការជូនដំណឹងដល់ប្រទេសកូរ៉េខាងត្បូងថា យន្តហោះរបស់ខ្លួន កំពុងតែធ្វើការហ្វឹកហាត់តាមប្រក្រតី នៅមុនពេលដែលយន្តហោះចិនទាំងនោះ បានហោះចូលក្នុងតំបន់ការពារដែនអាកាសកូរ៉េ៕
