នាវាទ័ពជើងទឹក អាមេរិក បាញ់ព្រមានក្រោយ នាវាអ៊ីរ៉ង ចូលមកជិត

បរទេស ៖ កងទ័ពជើងទឹក តាមសេចក្តីរាយការណ៍ បាននិយាយថា នាវាទ័ពជើងទឹក មួយគ្រឿង បានបាញ់ព្រមាន ក្រោយនាវា៣គ្រឿង ពីកងកម្លាំងការពារបដិវត្តន៍ ឥស្លាមរបស់ប្រទេសអ៊ីរ៉ង់ បានបើកចូលមកជិតខ្លួន និងនាវាល្បាតអាមេរិក មួយផ្សេងទៀត នៅតំបន់ឈូងសមុទ្រ ។

យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារ សារព័ត៌មាន China Daily នៅថ្ងៃទី២៨ ខែមេសា ឆ្នាំ២០២១ បានឲ្យដឹងថា ហេតុការណ៍បែបនេះ បានកើតមានម្តងម្តាលក្នុងរយៈពេល៥ឆ្នាំ កន្លងមក បើទោះជាមានការស្ងប់ស្ងាត់ខ្លះៗ កាលពីឆ្នាំមិញនេះក៏ដោយ។

នៅក្នុងសេចក្តីថ្លែង ការណ៍មួយ យោធាសហរដ្ឋអាមេរិក បាននិយាយប្រាប់ថា បុគ្គិលលើនាវាអាមេរិក បានធ្វើការព្រមានជាច្រើន តាមរយៈវិទ្យុទាក់ទង និងឧបករណ៍បំពងសម្លេង ប៉ុន្តែនាវារបស់កងកម្លាំងការពារបដិវត្តន៍ ឥស្លាមរបស់អ៊ីរ៉ង់ នៅតែបន្តដំណើរចូលមកជិតទៀត។

សេចក្តីថ្លែងការណ៍ដដែលនោះបានបន្តថា បន្ទាប់មក ទាហានជើងទឹក អាមេរិកលើនាវាល្បាត Firebolt ក៏បានបាញ់ព្រមាន ហើយនាវាអ៊ីរ៉ង់ទាំងនោះ ក៏បើកចេញទៅក្នុងចម្ងាយមាន សុវត្ថិភាពពីនាវារបស់សហរដ្ឋអាមេរិក ។

គួរបញ្ជាក់ថា ហេតុការណ៍នេះ បានកើតមានឡើង ស្របពេលដែលមហាអំណាច ពិភពលោកនានា និងប្រទេសអ៊ីរ៉ង់ ស្វះស្វែងពន្លឿនកិច្ចប្រឹងប្រែង នាំទីក្រុងវ៉ាស៊ីនតោន និងទីក្រុងតេអេរ៉ង់ ឲ្យវិលត្រឡប់អនុវត្តតាមកិច្ចព្រមព្រៀង នុយក្លេអ៊ែឆ្នាំ២០១៥វិញ៕
ប្រែសម្រួល៖ប៉ាង កុង