ជ្រកក្រោមទ្រនំឧស្សាហកម្មបច្ចេកវិទ្យា បុគ្គលជាច្រើនរូបបានខិតខំតស៊ូរហូតបង្កើត ចេញជាស្លាកយីហោនិងក្រុមហ៊ុនល្បីល្បាញ មានការទទួលស្គាល់ពីមនុស្សរាប់រយលាននាក់ជុំវិញពិភពលោក។ សង្ខេបចេញពីដំណើរជីវិត នៃស្ថាបនិក ៥ រូបរបស់ Amazon, Apple, Facebook និង Tesla អំឡុងពេលស្ថិតក្នុងវ័យ ២៥ ឆ្នាំ តើបុគ្គលជោគជ័យទាំងនោះជួបប្រទះរឿងអ្វីខ្លះ?
+ស្ថាបនិកនិងនាយប្រតិបត្តិ Amazon លោក Jeff Bezos:
នៅអាយុ ២៤ ឆ្នាំ Bezos បានធ្វើការនៅធនាគារមួយក្នុងតួនាទីជាអ្នកអភិវឌ្ឍកម្មវិធី។ ពីរឆ្នាំបន្ទាប់ លោកបានឡើងជាអនុប្រធានក្រុមហ៊ុន ដែលមានវ័យក្មេងបំផុត។
+ស្ថាបនិក Apple លោក Steve Jobs:
អំឡុងបើកទីផ្សារជួញដូរថ្ងៃទីមួយ ខែធ្នូ ឆ្នាំ ១៩៨០ ក្រុមហ៊ុន Apple Computer មានតម្លៃទីផ្សារ ១,២ ពាន់លានដុល្លារ ធ្វើឲ្យស្ថាបនិក Steve Jobs ក្លាយជាសេដ្ឋីក្នុងវ័យ ២៥ ឆ្នាំ។
លោកបានលើកឡើងនៅពេលនោះថា លោកមិនឲ្យទឹកលុយមកគ្រប់គ្រងជីវិតរបស់លោកនោះទេ។
+ស្ថាបនិក Facebook លោក Mark Zuckerberg:
Mark Zuckerberg ចំណាយពេលហត់នឿយច្រើន ពេលចាប់ផ្តើមដំណើរការក្រុមហ៊ុន Facebook ដំបូង។ ក្នុងឆ្នាំ ២០០៩ ពេលលោកចូលវ័យ ២៥ ឆ្នាំ Facebook មានចំនួនអ្នកប្រើប្រាស់ឡើងដល់ ៣០០ លាននាក់ជាលើកដំបូង។
Zuckerberg បានសរសេរលើ Facebook ដូច្នោះថា៖ “វាទើបតែចាប់ផ្តើមប៉ុណ្ណោះ”។ ១ ឆ្នាំក្រោយ Mark ជាប់ឈ្មោះជា Person of the Year លើទស្សនាវដ្ដី Time។
+ស្ថាបនិក Oracle លោក Larry Ellison:
ក្រោយផ្លាស់ទៅរស់នៅទីក្រុង Berkely បុរសវ័យ ២២ ឆ្នាំ ដែលបានបោះបង់ការសិក្សានៅមហាវិទ្យាល័យ បានចាប់យកចំណេះដឹងកាលនៅសិក្សា មកបង្រៀនខ្លួនឯងពីការបង្កើតកម្មវិធីលើកុំព្យូទ័រ។ សេដ្ឋីនិងស្ថាបនិកក្រុមហ៊ុន Oracle បានចាប់ការងារបច្ចេកទេសជាច្រើនកន្លែងដូចនៅ Fireman’s Fund, Wells Fargo និង AMPEX មុនបញ្ចប់នៅ Amdahl Corp., ជាកន្លែងដែលបុរសកើតក្នុងទ្រនំក្រខ្សត់រូបនេះ អាចចេះជំនាញប្រព័ន្ធបណ្តាញ មុនទៅបង្កើតក្រុមហ៊ុន Oracle។
+ស្ថាបនិក Tesla និង SpaceX លោក Elon Musk:
កៀកដល់វ័យ ២៥ ឆ្នាំ Musk បានសម្រេចបោះបង់ការសិក្សាថ្នាក់បណ្ឌិតនៅសកលវិទ្យាល័យ Stanford ហើយវិលមកចូលរួមជាមួយ dot-com ក្នុងការបង្កើតក្រុមហ៊ុនអ៊ីនធឺណិតដំបូងបង្អស់របស់ខ្លួនឲ្យឈ្មោះ Zip2។ ៤ ឆ្នាំក្រោយ Compaq បានបោះទុន ៣០៧ លានដុល្លារទិញយកក្រុមហ៊ុនរបស់លោក ហើយ Musk ក៏ផ្តើមប្រើលុយនោះបង្កើត Startup ថ្មីមួយទៀតគឺ PayPal។
ប្រភព៖ sabay
