ភ្នំពេញ៖ អ្នកនាង ស្រេង សុកាន់ដា ហៅ ខ្ញុង ត្រូវបានទស្សនិកប្រុសស្រីទូទាំងប្រទេសស្គាល់យ៉ាងច្បាស់ថា ជាតារាកំប្លែងស្រីជួរមុខនៅក្នុងក្រុមកំប្លែង CBS និងជាដៃគូស័ក្ដិសមបំផុតជាមួយនាយ ពាក់មី ។
ក្រៅពីអាជីពជាតារាកំប្លែង បច្ចុប្បន្ននេះ នាងខ្ញុង ក៏កំពុងកាក់កប ជាមួយការងាររកស៊ីជួញដូរផ្សេងៗផងដែរ នៅលើបណ្ដាញសង្គម ។ ដូច្នេះហើយទើបទស្សនិកជនមួយចំនួនធំបានទទួលស្គាល់ថា នាងខ្ញុង ជាតារាកំប្លែងស្រីល្បីឈ្មោះម្នាក់ ប៉ុន្តែមិនប្រកាន់ឫកពាឡើយ ពោលគឺមុខរបរតូចតាចដូចជា លក់ប្រហុក ផ្អក ក៏នាងអាចប្រកបទៅបានដោយទទួលបានការគាំទ្រជាច្រើន ។
ជាមួយគ្នានេះដែរ ប៉ុន្មានម៉ោងមុននេះ ស្រាប់តែតារាកំប្លែងស្រីសម្ដីចាក់មិនលេចខាងលើ បានធ្វើឱ្យទស្សនិកជន អ្នកគាំទ្រជាច្រើនភ្ញាក់ផ្អើលយ៉ាងខ្លាំង បន្ទាប់ពីនាងបានប្រកាសក្ដែងៗតាមរយៈវីដេអូផ្សាយផ្ទាល់ថា នឹងឈប់ពីសិល្បៈ ដូច្នេះនាងក៏បានសុំចិត្តទស្សនិកជន អ្នកគាំទ្រនាងទាំងអស់ មេត្តានៅបន្តស្រលាញ់គាំទ្រនាង ទោះជានាងនឹងលែងជាអ្នកសិល្បៈក៏ដោយ ។
«ខ្ញុំសុំចិត្តបងប្អូន សូមឱ្យស្រឡាញ់ខ្ញុំ ជាខ្ញុំ កុំស្រឡាញ់ខ្ញុំ ដោយសារតែខ្ញុំជាអ្នកសិល្បៈ» នាង ខ្ញុង ពោល ។
តាមរយៈវីដេអូផ្សាយផ្ទាល់ រយៈពេលជិត ១ម៉ោង នាង ខ្ញុង និយាយបណ្ដើរហូរទឹកភ្នែកបណ្ដើរ យ៉ាងដូច្នេះថា នាងនឹងឈប់ពីការងារសិល្បៈ ទោះជាការងារនេះបានផ្ដល់អ្វីៗគ្រប់យ៉ាងដល់នាងដល់សព្វថ្ងៃ មិនថាទាំងកេរ្តិ៍ឈ្មោះ និងទ្រព្យសម្បត្តិ ក៏ដោយ ប៉ុន្តែនាងមានហេតុផលផ្ទាល់ខ្លួនដែលត្រូវតែឈប់ ។
យ៉ាងណាក៏ដោយ នៅក្នុងវីដេអូផ្សាយផ្ទាល់នោះ អ្នកនាង ខ្ញុង មិនបានបង្ហាញច្បាស់ពីមូលហេតុដែលធ្វើឱ្យនាងនឹងលាឈប់ឡើយ ដោយគ្រាន់តែបង្ហើបថា ប្រសិនបើកន្លែងមួយដែលធ្វើឱ្យនាងរស់នៅសុខស្រួល នោះនាងក៏មិនចាកចេញទៅណាដែរ ។ ប៉ុន្តែ ខ្ញុង ក៏នៅតែបញ្ចាក់ដដែលៗថា សម្រាប់ការងារសិល្បៈគឺនាងនៅតែស្រឡាញ់ ហើយការងារនេះហើយ ដែលអាចធ្វើឱ្យនាង និងមនុស្សជុំវិញខ្លួនសើចសប្បាយ ។
ជុំវិញការប្រកាសនឹងលាឈប់ពីសិល្បៈរបស់ នាង ខ្ញុង នេះផងដែរ Lookingtoday នឹងព្យាយាមទាក់ទង សាកសួរលម្អិត ដើម្បីផ្សាយជូនប្រិយមិត្តបានដឹងកាន់តែច្បាស់ថែមទៀត ប៉ុន្តែពេលនេះនៅមិនទាន់អាចទាក់ទងនាងបានឡើយ ។
គួររំឭកដែរថាតារាកំប្លែងស្រីមានសម្តីញ៉ែតៗ បែបឆ្នាស់ឆ្នើមខាងលើ បានហក់ចូលវិស័យសិល្បៈកំប្លែង និងទទួលបានកេរ្តិ៍ឈ្មោះល្បីល្បាញខ្លាំង ខណៈពេលបានចូលរួមសម្តែង ជាមួយដៃគូសម្តែងប្រុសគឺនាយ ពែកមី តាំងពីកំលុងឆ្នាំ ២០០៩ មកម្ល៉េះ៕
ដោយ៖ ម៉ានី
