សិល្បៈ និង កម្សាន្ត

វណ្ណ ម៉ូនិច បញ្ចេញ​អាយុ​ពិត ​ស្វាមី​លើក​ដំបូង មាន​អ្នក​ភ្ញាក់ ព្រោះ​មិន​ចង់​ជឿ​ទាល់​តែ​សោះ

អតីត​តារា​សម្ដែង វណ្ណ ម៉ូនិច ដែល​បាន​ជួប​ប្រសព្វ ​ជាមួយ​ស្វាមី ​ដែល​អ្នកជំនួញ​ធំ​ម្នាក់​នោះ នៅ​ព្រឹក​នេះ​បាន​បញ្ចេញ​តួលេខ ​អាយុ​ពិត​ប្រាកដ​របស់​ស្វាមី ធ្វើ​ឲ្យ​ប្រិយមិត្ត​មួយ​ចំនួន​ មាន​ការ​ភ្ញាក់​ផ្អើល ។

វណ្ណ ម៉ូនិច អតីត​តួស្រី​ក្នុង​រឿង “ផ្កា​រីក​ក្នុង​ចិត្ត” របស់​ទូរទស្សន៍​ប៉ុស្ដិ៍​លេខ ៥ កាល​ពី​ប្រមាណ ១០​ឆ្នាំ​មុន ។ ប៉ុន្តែ​ក្រោយ​ពី​លេច​មុខ ​បាន​តែ​មួយ​រឿង នាង​ក៏​បន្សាត់​ខ្លួន​ឆ្ងាយ​ៗ​ទៅ​ពី​សិល្បៈ ។ ចុងក្រោយ​បំផុត​ប្រិយមិត្ត​ នៅ​អាច​ឃើញ​សកម្មភាព ​របស់​នាង​ខ្លះ​តាម​រយៈ​បណ្ដាញ IG ដែល​ជា​រឿយៗ គេ​ឃើញ​នាង​បើក​បង្ហាញ​ពី​ជីវិត​ឯកជន ​របស់​នាង​ដែល​មាន​ស្វាមី និង​កូន​ប្រុស​២នាក់ ​ហើយ​នៅ​ពេល​នេះ។

និយាយ​ជា​ស្វាមី​របស់​នាង គឺ​ជា​អ្នកជំនួញ​ធំ​ម្នាក់ ដែល​អាច​ផ្គត់ផ្គង់​ ឲ្យ​តារា​ស្រី​ធ្មេញ​ច្រពើស ​រស់​នៅ​សុខស្រួល ក្នុង​ជីវភាព​យ៉ាងហ៊ឺហារ រស់​នៅ​ក្នុង​ភូមិ​គ្រឹះស្កឹមស្កៃ មាន​រថយន្ត​ប្រណិត ២-៣ គ្រឿង មាស ពេជ្រ ពេញ​ខ្លួន ។ ងាក​ទៅ​ស្វាមី​នាង​ដដែល បុរស​វ័យ​កណ្ដាល ​រមែង​បង្ហាញ​មុខ​ជាមួយ​ស្ថានភាព​សាមញ្ញៗ ស្លៀក​តែ​ខោខ្លី អាវយឺត​ភាគច្រើន​បំផុត ។

បុរស​រូប​នេះ តែង​បញ្ចេញ​ស្នាមញញឹម ពព្រាយ​ពេល​នៅ​ជុំ​គ្រួសារ ផ្សំ​នឹង​ការ​តុបតែង​ខ្លួន ​ដូច​ជាយុវវ័យ​មួយ​រូប​ផង គ្រប់​គ្នា​គិត​ថា លោក​ទំនង​មាន​អាយុ​មិន​ច្រើន​ទេ ។ ប៉ុន្តែ​ក្រោយ ម៉ូនិច ទម្លាយ​ថ្ងៃ​នេះ ទើប​ម្នាក់​ៗ​បើក​ភ្នែក​ធំ​ៗ និង​មិន​ជឿ​ថា លោក​មាន​អាយុ​ច្រើន ​ដល់​ថ្នាក់​នេះ។ អតីត​តារា​ស្រី​សរសេរ​ប្រាប់​មិត្តភ័ក្ដិ និង​អ្នក​នៅ​លើ​បណ្ដាញ IG ថា “អ្នក​ ៤២​ នឹង​ អ្នក​ ២៩​ ឆ្នាំ” ។

តួលេខ​នេះ បាន​ធ្វើ​ឲ្យ​ប្រិយមិត្ត ​ជា​ច្រើន​មិន​ចង់​ជឿ ដូច​យ៉ាង​ប្រិយមិត្ត​ម្នាក់ ​បាន​ចូលមក​សរសេរ​សារ​ថា ៖ “បង ប្រុសក្មេង បើសិនជាបងមិននិយាយខ្ញុំ​ គិតថា គ្រួសារបងក្មេងៗដូចគ្នាណាស់” ។

វណ្ណ ម៉ូនិច ត្បិត​ថា ​មិន​បាន​សាង​ភាព​ត្រចះត្រចង់​ខ្លាំង ​នៅ​ក្នុង​សង្គម​សិល្បៈ ប៉ុន្តែ​អតីត​តារា​ស្រី​រាងតូចច្រឡឹង​រូប​នេះ ត្រូវ​បាន​គេ​ឃើញ​ថា នាង​មាន​ភាព​ជោគជ័យ​ក្នុង​សង្គម​គ្រួសារ និង​ស្នេហា ព្រោះ​ថា​ពេល​នេះ នាង​មាន​ស្វាមី​ល្អ​ម្នាក់ ដែល​ជួយ​ទំនុកបម្រុង​ ឲ្យ​រស់​នៅ​ស្រួល​ក្នុង​ជីវភាព​ដ៏​ស៊ីវិល័យ ថែម​ទាំង​មាន​កូន​ប្រុស​២នាក់​​ថែម​ទៀត ដែល​ប្រិយមិត្ត​លើក​ឡើង​ថា ម៉ូនិច ជោគជ័យ​ខ្លាំង​ក្នុង​ជីវិត​គ្រួសារ ៕

Most Popular

To Top