អាមេរិក៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ព្រឹត្តិការណ៍បាល់ទាត់ពិភពលោក មិនត្រឹមតែនិយាយអំពីបាល់ទាត់ប៉ុណ្ណោះទេ ខណៈ FIFA កំពុងទាញយកតារាចម្រៀងល្បីៗ ដើម្បីលើកកម្ពស់ការប្រកួតប្រជែង ទៅជាព្រឹត្តិការណ៍វប្បធម៌សកល ដោយពង្រីកវិសាលភាព របស់ខ្លួនលើសពីអ្នកគាំទ្រកីឡា។
ចាប់ពីសិល្បករល្បីៗលើពិភពលោក ដែលសម្តែងក្នុងពិធីបើករហូត ដល់ការសម្តែងសម្រាកពាក់កណ្តាលម៉ោងបែប Super Bowl ដែលមិនធ្លាប់មានពីមុនមកក្នុងអំឡុងពេលវគ្គផ្តាច់ព្រ័ត្រ នេះជាអ្វីដែលត្រូវរំពឹងទុក ។ ពិធីបុណ្យចាប់ផ្តើមនៅថ្ងៃពុធ នៅមុនថ្ងៃប្រកួត ជាមួយនឹងការប្រគំតន្ត្រីនៅទីក្រុងម៉ិកស៊ិក តូរ៉ុនតូ និងឡូសអាន់ជឺឡេស ដែលរួមបញ្ចូលគ្នានូវតារាល្បីៗអន្តរជាតិ និងឥស្សរជនសំខាន់ៗក្នុងតំបន់។
ឈ្មោះធំៗរួមមានតារាចម្រៀងប៉ុបអាមេរិក Katy Perry សិល្បករកាណាដា Alanis Morissette តារាចម្រៀងរ៉េបអាមេរិក Future តារាចម្រៀងប៉ុបទីក្រុងប្រេស៊ីល Anitta តារាចម្រៀង K-pop នាង Lisa និងតារាចម្រៀង Afrobeats នីហ្សេរីយ៉ា Rema។
ពួកគេនឹងសម្តែងរួមគ្នាជាមួយសិល្បករដែលមានអ្នកគាំទ្រខ្លាំងនៅក្នុងប្រទេសកំណើត ដូចជាតារាចម្រៀង Bollywood របស់ម៉ិកស៊ិក Nora Fatehi និងតារាចម្រៀងរ៉េបបារាំង Vegedream។
លោក Clayton Durant សហគ្រិនឧស្សាហកម្មតន្ត្រី និងជាសាស្ត្រាចារ្យនៅសាកលវិទ្យាល័យញូវយ៉ក បានមានប្រសាសន៍ថា “មានកិច្ចខិតខំប្រឹងប្រែងរួមគ្នាជុំវិញ FIFA World Cup និងក្រុមទីផ្សាររបស់ពួកគេ ដើម្បីទាញយកអត្ថប្រយោជន៍ពីតន្ត្រីជាមធ្យោបាយមួយ ដើម្បីភ្ជាប់ទស្សនិកជនផ្សេងៗគ្នាមកពីជុំវិញពិភពលោក”៕
