ប្រធានមន្ទីរពិសោធ ក្រុងវូហាន ចេញបដិសេធ ករណីចោទប្រកាន់ ពាក់ព័ន្ធនឹងកូវីដ១៩

ប៉េកាំង៖ លោក Yuan Zhiming ជាប្រធាននៃមន្ទីរពិសោធន៍ របស់ទីក្រុងវូហាន នៅថ្ងៃពុធនេះ បានចេញមកធ្វើការអះអាងថា រាល់ការចោទប្រកាន់ ដែលលើកឡើងថា វីរុសកូរ៉ូណា មានប្រភពចេញពី មន្ទីរពិសោធន៍ ជីវឧស្ម័នជាតិ របស់ប្រទេសចិន នៅឯវិទ្យាស្ថានវូហានឬ WIV គឺជាការចោទប្រកាន់ ដែលគ្មានមូលដ្ឋានច្បាស់លាស់ និងមិនមានភស្តុតាងគ្រប់គ្រាន់ ។

ទីភ្នាក់ងារចិនស៊ិនហួ ចេញផ្សាយនៅថ្ងៃពុធ ទី២៩ ខែមេសានេះ បានសរសេរថា ជាការឆ្លើយតបលោក Yuan បានបកស្រាយយ៉ាងច្បាស់ៗថា ជាក់ស្តែង WIV មិនមានផែនការឬបំណង ឬសូម្បីតែសមត្ថភាពគ្រប់គ្រាន់ ដើម្បីបង្កើតវិរុសថ្មីឡើយ ហើយយើងសង្កេតឃើញថា មិនមានព័ត៌មាន និងភស្តុតាងគ្រប់គ្រាន់ឡើយ ដែរថាវិរុស SARS-Cov-2 គឺត្រូវបានបង្កើតឡើង ដោយមនុស្សដូចទៅនឹង ការចោទប្រកាន់ទាំងនោះដែរ។

ផ្ទុយទៅវិញអ្នកវិទ្យាសាស្ត្រ ភាគច្រើននិយាយថា SARS-CoV-2 មានដើមកំណើតពីសត្វព្រៃ ដូចជាសត្វប្រចៀវ និងសត្វពង្រូលទៅវិញនោះទេ ដែលមតិជារួមបានអះអាងបែប វិទ្យាសាស្ត្រថា មេរោគឆ្លងទាំងនេះ គឺជាក់ស្តែងចម្លង តាមធម្មជាតិប៉ុណ្ណោះ។

ប្រធានមន្ទីរពិសោធន៍រូបនេះ ក៏បានច្រានចោលផងដែរ អំពីការលើកឡើងថា មន្ទីរពិសោធន៍បានធ្វើឲ្យបែកធ្លាយ វីរុសកូរ៉ូណា ដោយចៃដន្យដែលខ្លួន ប្រមូលបានពីសត្វប្រចៀវ ដែលកន្លងមកខ្លួន បានប្រើប្រាស់វាក្នុងគោលបំណង ស្រាវជ្រាវនោះ៕

ប្រែសម្រួល៖ស៊ុនលី