ថ្មីៗនេះ ឥណ្ឌាគ្រោងផ្លាស់ប្តូរឈ្មោះប្រទេសទៅជាឈ្មោះ បារ៉ាត (Bharat) ដោយចង់លុបបំបាត់ស្លាកស្នាមក្នុងប្រវត្តិសាស្រ្ត ដែលធ្លាប់ស្ថិតក្រោមអាណានិគមអង់គ្លេស និងចង់សំដៅលើកស្ទួយសាសនាហិណ្ឌូ។ យ៉ាងណាមិញ រឿងប្តូរឈ្មោះប្រទេសនេះ ពុំមែនជារឿងថ្មីឡើយ ព្រោះថា ជិត ៩០ឆ្នាំមកនេះ មានប្រទេសជាច្រើនហើយ ដែលបានផ្លាស់ប្តូរឈ្មោះ ក្រោមហេតុផលផ្សេងៗគ្នា។ ប៉ុន្តែយើងសូមលើកប្រទេសចំនួន៧ប៉ុណ្ណោះ មកបង្ហាញដូចខាងក្រោម៖
១. ពែរ្ស (Persia) ប្តូរមកជា អ៊ីរ៉ង់ (Iran) នៅក្នុងឆ្នាំ១៩៣៥ ដោយសាររដ្ឋាភិបាលពេលនោះ ចង់ស្តារឈ្មោះដើមរបស់ប្រទេសខ្លួនឡើងវិញ និងលុបបំបាត់អតីតកាលដែលស្ថិតក្រោមឥទ្ធិពលលោកខាងលិច ពោលគឺឈ្មោះ Persia ត្រូវបានហៅដោយចក្រភពក្រិច។
២. សៀម (Siam) ប្តូរមកជា ថៃ (Thailand) នៅក្នុងឆ្នាំ ១៩៣៩ ធ្វើឡើងបន្ទាប់ពីប្រទេសនេះបានផ្លាស់ប្តូរទៅជារបបរាជាធិបតេយ្យអាស្រ័យធម្មនុញ្ញ។
៣. ប៉ាគីស្ថានខាងកើត (East Pakistan) ប្តូរមកជា បង់ក្លាដែស (Bangladesh) នៅក្នុងឆ្នាំ ១៩៧១ បន្ទាប់ពី ប៉ាគីស្ថានខាងកើត ផ្តាច់ខ្លួនចេញពី ប៉ាគីស្ថានខាងលិច។ ការប្រកាសឯករាជ្យនេះ ក្រោយផ្ទុះសង្គ្រាមដ៏សាហាវឃោឃៅរវាងភាគីទាំងពីរ។ ការប្តូរឈ្មោះមក បង់ក្លាដែសនេះ ក៏ដើម្បីឆ្លុះបញ្ចាំងពីភាពខុសគ្នានូវវប្បធម៌ ភាសា សាសនា និងនយោបាយពី ប៉ាគីស្ថានខាងលិចផងដែរ។
៤. សីឡុន (Ceylon) ប្តូរមកជា ស្រីលង្កា (Sri Lanka) នៅក្នុងឆ្នាំ១៩៧២ ពេលប្រកាសខ្លួនជាសាធារណរដ្ឋ ក្រោយទទួលបានឯករាជ្យពីអង់គ្លេស។ Sri Lanka ជាពាក្យនៅក្នុងភាសា Sinhalese។
៥. ឆេកូស្លូវ៉ាគី (Czechoslovakia) បំបែកទៅជា សាធារណរដ្ឋឆេក (Czech Republic) និង ស្លូវ៉ាគី (Slovakia) នៅក្នុងឆ្នាំ១៩៩៣ បន្ទាប់ពីបញ្ចប់របបដឹកនាំកម្មុយនីស្ត ហើយសម្រេចបែងចែកតំបន់គ្នារវាងជាតិសាសន៍ឆេក និងស្លូវ៉ាក់ ដោយសន្តិវិធី ឱ្យក្លាយជាប្រទេសរៀងៗខ្លួន។ យ៉ាងណាមិញ ការហៅឈ្មោះ សាធារណរដ្ឋឆេក ហាក់វែងពេក ដូច្នេះប្រទេសមួយនេះ ក៏ចង់ប្តូរឈ្មោះខ្លីដែរ ទៅជា Czechia វិញដើម្បីងាយស្រួលហៅ តែមិនទាន់ផ្លូវការទេ។
៦. ភូមា (Burma) ប្តូរមកជា មីយ៉ាន់ម៉ា (Myanmar) នៅក្នុងឆ្នាំ១៩៨៩ ធ្វើឡើងដោយរដ្ឋាភិបាលយោធា ដើម្បីបង្ហាញពីឥទ្ធិពល និងអំណាចរបស់ខ្លួនដែលកាន់កាប់ប្រទេសនេះស្របច្បាប់។
៧. ស្វាស៊ីឡង់ (Swaziland) ប្តូរមកជា អ៊ីស្វាទីនី (Eswatini) នៅក្នុងឆ្នាំ២០១៨ ធ្វើឡើងក្នុងពេលប្រទេសនេះ ប្រារព្ធខួបទី៥០ នៃការទទួលបានឯករាជ្យពីអង់គ្លេស។ ការប្តូរឈ្មោះនេះ បន្ទាប់ពីស្តេច Mswati មានការបារម្ភពីការហៅឈ្មោះប្រទេសខ្លួនច្រឡំនឹង ប្រទេសស្វីស (Switzerland) ដែលកាន់របបខុសគ្នាទាំងស្រុង៕
