កាលពីព្រេងនាយ មានបុរស៥០០នាក់បានលិចសំពៅនៅកណ្ដាលសមុទ្រ ហើយរសាត់អណ្ដែតមកដល់កោះលង្កាដែលជាដែនដីរបស់យក្ស។ ពួកយក្ខិនីដែលនៅទីនោះតែងតែយកពួកដែលមកទើរលើកោះធ្វើជាប្តី និងជាចំណីអាហារ។ ជាទម្លាប់បើមានសំពៅមួយលិច ពួកយក្ខិនីយកពួកសំពៅនោះធ្វើជាប្តី ហើយថ្ងៃក្រោយមកទៀតបើមានសំពៅណាថ្មីលិចទៀត ពួកនាងយក្សនឹងចាប់ស៊ីពួកសំពៅចាស់ ឬប្ដីចាស់នោះអស់ ហើយយកពួកសំពៅថ្មីធ្វើជាប្ដីម្ដង។
ពេលបុរសទាំង៥០០បានមកដល់កោះលង្កាហើយ ពួកនាងយក្សបានកាឡាខ្លួនជាស្រីស្អាតៗ នាំយកម្ហូបអាហារ មកចែចង់ពួកបុរសទាំងនោះដោយប្រាប់ថាប្ដីរបស់ពួកគេទៅរកស៊ីជួញសំពៅដែរ តែយូរឆ្នាំមកហើយមិនដែលឃើញមកវិញទេ ប្រហែលជាស្លាប់អស់ហើយ សុំឲ្យពួកគេរស់នៅសោយសុខលើកោះនោះ ពួកខ្លួនស្ម័គ្រចិត្តធ្វើជាប្រពន្ធ។ ពួកបុរសទាំង៥០០នាក់សប្បាយចិត្តណាស់ ហើយព្រមព្រៀងគ្នាតាមនោះ។ នេះបើតាមលោក ម៉ៅ វុត្ថា ជាអ្នកស្រាវជ្រាវធ្វើការបកស្រាយ។
ពួកនាងយក្ខបានចាប់យកពួកប្រុសៗដែលមកមុនដាក់ក្នុងទ្រុងលាក់ទុកនៅរូងភ្នំខាងក្រោយក្រុង ដោយដល់វេលាយប់ឡើង ចាប់ស៊ីម្ដងមួយៗ។ មានបុរសម្នាក់ដែលជាមេក្រុមបានតាមដានដឹង ហើយក៏ខ្សឹបប្រាប់ក្រុមមនុស្សទាំងអស់ ថាការពិតពួកនាងគឺជាយក្ខិនីទេ ប៉ុន្តែមានអ្នកជឿតែពាក់កណ្ដាលប៉ុណ្ណោះ។ ពួកក្រុមបុរសដែលជឿទាំង២៥០នាក់បានលបលួចរត់ចេញពីកោះនោះ។
ក្នុងពេលនោះឯងព្រះបរមពោធិសត្វបានយោងយកកំណើតជាសត្វសេះវលាហក ដ៏មានឫទ្ធិ ព្រះអង្គតែងតែហោះទៅបរិភោគស្មៅនៅកោះលង្កា ហើយពេលត្រឡប់មកវិញតែងតែបន្លឺសម្លេងរកអ្នកណាដែលចង់ទៅជម្ពូទ្វីបខ្លះ ត្រូវមកតាមព្រះអង្គ។ ពេលនោះបុរសទាំង២៥០នាក់បានសុំឲ្យសេះវលាហក ជួយ ដោយបួងសូមដល់គុណបុណ្យបារមីព្រះពោធិសត្វឲ្យអាចជួយពួកខ្លួនអាចគេចផុតពីកណ្ដាប់ដៃយក្ស។ សេះវលាហក បានឲ្យក្រុមនាយសំពៅតោងខ្លួន ហើយហោះនាំយកមកពួកអ្នកទាំងនោះទៅដល់ជម្ពូទ្វីបដោយសុខសុវត្ថិភាព។ រីឯបុរសផ្សេងទៀតដែលមិនជឿ ត្រូវបានយក្ខិនីចាប់ស៊ីទាំងអស់។
នៅក្នុងអនុក្រឹត្យដែលចុះហត្ថលេខា ដោយសម្ដេចតេជោនាយករដ្ឋមន្រ្តីនៃកម្ពុជាកាលពីថ្ងៃទី០៧ ខែឧសភា ឆ្នាំ២០១៥ បានសម្រេចឲ្យធ្វើចរាចរ និងប្រើប្រាស់ក្នុងទូទាំងព្រះរាជាណាចក្រកម្ពុជា នូវធនប័ត្រប្រភេទ ១០០០០ រៀល គំរូថ្មី ដើម្បីចូលរួមអបអរសាទរក្នុង ឱកាសព្រះរាជពិធីបុណ្យចម្រើនព្រះជន្ម ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃកម្ពុជា។
នៅលើក្រដាសប្រាក់គេឃើញមានរូបសេះវលាហក ដែលត្រូវបានគេចម្លងចេញពីរូបសំណាកនៅប្រាសាទនាគព័ន្ធ ជាអតីតមន្ទីរពេទ្យមួយនៅ កណ្ដាលបារាយណ៍ជ័យតដាក ក្នុងចំណោមមន្ទីរពេទ្យសរុបទាំងអស់ចំនួន១០២ កន្លែងនៅទូទាំងអាណាចក្រអង្គររបស់ព្រះអង្គ៕ប្រភព៖sabay
