ទម្លាប់ក្នុងការរស់នៅប្រចាំថ្ងៃ ពិតជាមានសារ:សំខាន់ខ្លាំងណាស់ សម្រាប់សុខភាពរបស់មនុស្សគ្រប់រូប។ ក៏ប៉ុន្តែទម្លាប់ក្នុងការរស់នៅ ក៏ទាក់ទងជាមួយនឹងភាព ចាស់ជរាមុនអាយុផងដែរ ប្រសិនបើអ្នកអនុវត្តមិនបានល្អ។
ខាងក្រោមនេះ គឺជាទម្លាប់រស់នៅមិនល្អ ៤ចំណុច អាចបណ្តោលឲ្យអ្នកក្លាយ ទៅជាមនុស្សឆាប់ចាស់ជាងវ័យ៖
១.ស្ត្រេសរាល់ថ្ងៃបញ្ហាស្ត្រេស ភាគច្រើនកើតឡើងដោយសារ តែសម្ពាធការងារ ឬចំពោះមនុស្សដែលគិតច្រើនពេក។ ប្រសិនបើអ្នកគ្រប់គ្រងបញ្ហានេះមិនបានទេ វាអាចបណ្តោលឲ្យកើតជំងឺផ្លូវចិត្ត ប៉ះពាល់ដល់សុខភាព កង្វះថាមពល និងធ្វើឲ្យកោសិកោវិវត្ត ទៅរកភាពចាស់កាន់តែលឿន។ លើសពីនេះទៅទៀត បញ្ហាស្ត្រេស អាចបង្កឲ្យអ្នកស្រកទម្ងន់ ខ្សោយប្រព័ន្ធភាពស៊ាំ ឡើងសម្ពាធឈាម រំខានដល់ការគេង និងកើតជំងឺវិលកចរិត។
២.ញ៉ាំអាហារសម្បូរជាតិស្ករអ្នកណាក៏ដឹងដែរ ការទទួលទានអាហារដែលសម្បូរជាតិស្ករ អាចបណ្តោលរាងកាយឡើងទម្ងន់ ប៉ុន្តែក្រុមអ្នកជំនាញសុខភាពបានព្រមានថា ជាតិស្ករ ក៏អាចក្លាយទៅជាសត្រូវដ៏ធំបំផុត ដែលធ្វើឲ្យរាងកាយឈានទៅរក ភាពឆាប់ចាស់លឿនផងដែរ។ ជាតិស្ករ អាចធ្វើឲ្យស្បែកឆាប់ខូច ដោយសារតែខ្សោះជាតិទឹក នៅក្នុងស្រទាប់ខូឡាជែន (collagen) ដែលធ្វើឲ្យស្បែកប្រែក្លាយទៅជាស្ងួត និងលេចស្នាមជ្រួញជាដើម។ មិនតែប៉ុណ្ណោះ វាអាចធ្វើឲ្យកើតមានរង្វង់ភ្នែកខ្មៅ ហើមត្របកភ្នែក ដែលធ្វើឲ្យអ្នកមើលទៅកាន់តែចាស់។ នេះបើយោងតាមការស្រាវជ្រាវ ដែលចុះផ្សាយនៅក្នុងកាសែត British Journal of Dermatology ។
៣.ចូលចិត្តចង់ចាំរឿងដែល អាក្រក់ភាពភ័យខ្លាច និងការចង់កំហឹង មិនត្រឹមតែធ្វើឲ្យប៉ះពាល់ដល់ សុខភាពផ្លូវចិត្តប៉ុណ្ណោះទេ វាក៏អាចប៉ះពាល់ដល់ សុខមាលភាពរាងកាយផងដែរ។ ប្រសិនបើអ្នកនៅតែបន្តគិត រឿងអាក្រក់ដែលទាំងនោះយូរអង្វែង នោះជីវិតអ្នកនឹងខើចខ្លី។ ការស្រាវជ្រាវមួយដែលបាន ចេញផ្សាយនៅក្នុងទស្សនាវដ្តី Behavioral Medicine បានរកឃើញថា ការគិតតែរឿងអាក្រក់ៗ អាចកាត់បន្ថយគុណភាពនៃការគេង បង្កើនអ័រម៉ូនស្ត្រេស បង្កើនសម្ពាធឈាម និងបង្កើនជាតិស្ករនៅក្នុងឈាម ដែលជាហេតុធ្វើឲ្យអ្នកឡើងទម្ងន់ និងឆាប់ចាស់ដោយមិនដឹងខ្លួន។
៤.មើលទូរទស្សន៍ច្រើនពេក ការសិក្សាទៅលើមនុស្សពេញវ័យចំនួន ១១,០០០ នាក់ បានរកឃើញថា ការអង្គុយមើលទូរទស្សន៍ជាមធ្យមត្រឹមតែ ២២នាទី អាចបណ្តោលឲ្យពួកគេឆាប់ចាស់ជាងវ័យ និងមានអាយុខ្លី។ អ្នកដែលមើលទូរទស្សន៍ ៦ម៉ោងក្នុងមួយថ្ងៃ មានអាយុទាបជាងអ្នកមិនមើល ៥ឆ្នាំ។ ទន្ទឹមនឹងនេះ សម្រាប់អ្នកដែលធ្វើការអង្គុយច្រើន ក៏ប្រឈមនឹងហានិភ័យដូចគ្នាដែរ ៕
