កូរ៉េខាងត្បូង៖ តុលាការបញ្ជាឱ្យផ្តល់សំណង ដល់គ្រួសារបុរសម្នាក់ ដែលមានជំងឺផ្លូវចិត្ត ហើយស្លាប់ ដោយសារតែប៉ូលីស ចាប់វាយខ្នោះ

បរទេស៖ តុលាការក្រុងសេអ៊ូល ប្រទេសកូរ៉េខាងត្បូងបានបញ្ជាឱ្យ រដ្ឋាភិបាលផ្តល់សំណង ដល់គ្រួសាររបស់បុរសម្នាក់ ដែលមានជំងឺផ្លូវចិត្ត ដែលបានស្លាប់បន្ទាប់ពីត្រូវបាន ប៉ូលីសដាក់ខ្នោះដៃ។ នេះបើតាមកំណត់ត្រា របស់តុលាការ ដែលត្រូវបានបង្ហាញនៅថ្ងៃសៅរ៍នេះ។

យោងតាមសារព័ត៌មាន Yonhap News ចេញផ្សាយនៅថ្ងៃទី១ ខែមករា ឆ្នាំ២០២២ បានឱ្យដឹងថា តុលាការក្រុងសេអ៊ូល នាពេលថ្មីៗនេះ បានសម្រេចថា រដ្ឋត្រូវបង់ប្រាក់ចំនួន 320 លានវ៉ុន (269,160 ដុល្លារអាមេរិក) ដល់គ្រួសារជនរងគ្រោះ ជុំវិញការប្រើប្រាស់កម្លាំងហួសហេតុ ដោយការអនុវត្តច្បាប់។

ឧបទ្ទវហេតុប៉ូលីសដាក់ខ្នោះដៃទៅលើបុរសដែលមានជំងឺផ្លូវចិត្តនេះ បានកើតឡើងក្នុងខែមករា ឆ្នាំ 2019 នៅពេលដែលប៉ូលីស និងបុគ្គលិកសង្គ្រោះបន្ទាន់ ត្រូវបានគេហៅទៅកាន់ផ្ទះមួយក្នុងទីក្រុង តាមរបាយការណ៍របស់ក្រុមគ្រួសារថា បុរសនោះបង្ហាញអាកប្បកិរិយាមិនប្រក្រតី។

បុរសដែលមានបញ្ហាផ្លូវចិត្តមិនព្រមឱ្យគេយកទៅមន្ទីរពេទ្យទេ ហើយបានប្រឈមមុខនឹងប៉ូលិសដោយគាត់មានកាំបិតពីរទៅបីក្នុងដៃ។ សមត្ថកិច្ចបានប្រើកាំភ្លើងភ្ជង់វាយបុរសរូបនោះ ក្រោយមកបានសង្កត់លើពោះគាត់ នៅលើគ្រែប្រមាណ១០នាទី ដោយចាប់ដាក់ខ្នោះដៃទៅក្រោយ និងយកបង់រុំកជើង ។

ពេលក្រុមអ្នកជួយសង្គ្រោះព្យាយាមយកចេញ (ខ្នោះ និងបង់) គាត់បានសន្លប់។ គាត់ត្រូវបានគេយកទៅមន្ទីរពេទ្យ ហើយបានស្លាប់ រយៈពេល៥ខែក្រោយមក៕

ប្រែសម្រួលៈ ណៃ តុលា