បរទេស៖ ក្រសួងការពារជាតិរុស្ស៊ីបានប្រកាសកាលពីថ្ងៃសៅរ៍ថា ឧត្តមសេនីយ៍កងទ័ពជើងគោក លោក Sergey Surovikin ដែលកំពុងដឹកនាំក្រុម “ភាគខាងត្បូង” នៃកងទ័ពនៅអ៊ុយក្រែន និង Donbass នឹងទទួលបន្ទុកបញ្ជាការរួមនៃកងកម្លាំងរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៨ ខែតុលា ឆ្នាំ២០២២ បានឱ្យដឹងថា សេចក្តីថ្លែងការណ៍របស់ក្រសួងការពារជាតិបានអានថា “តាមការសម្រេចចិត្តរបស់រដ្ឋមន្ត្រីក្រសួងការពារជាតិនៃសហព័ន្ធរុស្ស៊ី ឧត្តមសេនីយ៍កងទ័ពជើងគោក Sergey Surovikin ត្រូវបានតែងតាំងជាមេបញ្ជាការនៃក្រុមរួមនៃកងកម្លាំងនៅក្នុងតំបន់នៃប្រតិបត្តិការយោធាពិសេស” ។
ឧត្តមសេនីយជើងចាស់រូបនេះបានកាន់តំណែងជាមេបញ្ជាការកងកម្លាំងអាកាសរុស្ស៊ីតាំងពីឆ្នាំ ២០១៧។ ក្នុងឆ្នាំដដែលនោះ លោកបានទទួលងារជាវីរៈបុរសនៃប្រទេសរុស្ស៊ីសម្រាប់តួនាទីរបស់លោកនៅក្នុងប្រតិបត្តិការយោធានៅក្នុងប្រទេសស៊ីរី។ មុននោះគាត់ក៏បានចូលរួមក្នុងអរិភាពនៅឆេចយ៉ាផងដែរ។
យោងតាមរបាយការណ៍ប្រព័ន្ធផ្សព្វផ្សាយផ្សេងៗ លោក Surovikin ត្រូវបានផ្តល់រហស្សនាមថា ‘General Armageddon’ ដោយសហការីរបស់គាត់ ដោយលើកឡើងពីវិធីសាស្រ្តរឹងរូស និងមិនធម្មតារបស់គាត់ចំពោះប្រតិបត្តិការយោធា៕ប្រែសម្រួលៈ ណៃ តុលា
